Notisia di polis di djárason promé di desèmber te ku djabièrnè 3 di desèmber 2021
Kralendijk - Aksidente di kadena riba Kaya Korona - Alrededor di 7.45 or riba djabièrnè 3 di desèmber, sentral di polis a risibí notifikashon ku un aksidente di kadena entre tres outo a tuma lugá riba Kaya Korona. Personal di ambulans a atendé ku shofùr di e outo ku tabata mei mei den e aksidente, na e sitio mes despues di kua e por a bai kas.
Kiebro den ofisina
Riba djaweps 2 di desèmber a drenta keho di kiebro den un ofisina situá na Bulevar Gobernador Nicolaas Debrot. Deskonosínan a drenta e edifisio dor di e bentana di baño. No ta konosí ainda kiko a bai kuné. Ta investigando e kaso.
Aksidente na Subi Blanku
Den oranan di mainta, alrededor di 9.30 or riba djaweps 2 di desèmber, un aksidente a tuma lugá na Subi Blanku riba e kaminda di bai Rincon. Shofùr di e outo a deklará ku e mester a desviá pa un buriku ku diripiente a krusa kaminda. Hasiendo esaki el a baha for di kaminda i a pèrdè kòntròl i a resultá den mondi. Ambulans a transporte pa hospital pa tratamentu médiko.
Detenshon pa ladronisia
Riba djárason promé 1 di desèmber a drenta keho di ladronisia di un motor di boto. E motor tabata pega na un boto ku tabata stashoná den kura di un kas den Bario Den Tera. Entre 8.15 or i 10.15 or di anochi, deskonosínan a bai ku e motor. Ta trata di un motor di boto di marka Yamaha, estilo Enduro. Riba e kapa tin un strepi kolo kòrá ku oro. E tin un propèler blanku i hèndel koló pretu. Despues di investigashon kòrtiku a detené un hòmber di inisial E.H.C. di 63 aña di edat i un hòmber di inisial J.J.M. di 45 aña di edat en konekshon ku ladronisia i enkubrimentu di artíkulo hòrtá. Tambe a konfiská un kámara di seguridat, un pikòp, un skèr di heru di mara betòn (betonijzer) i e motor di boto hòrta, pa mas investigashon.
Búskeda di dama pèrdí ta kontinuá
Djadumingu 28 di novèmber último, Kuerpo Polisial Hulanda Karibense a inisiá búskeda di Benjamina Neuman despues ku famia a pidi yudansa di polis. A mira Benjamina último biaha djabièrnè 26 di novèmber na momentu ku e la bai drumi.
KPCN a inisiá un búskeda mesora na e sitionan ku Benjamina sa frekuentá. Alabes a hasi un yamada na pueblo di Bonaire kompletu pa mèldu asina sa algu di Benjamina. KPCN a investigá kada un di e tepnan aki sin resultado ainda.
Mirando ku no tin ningun indikashon di e paradero di Benjamina, KPCN mester sigui buska hopi amplio. P’esei KPCN ta bolbe hasi un supliká na komunidat di Bonaire kompletu pa si sa algu di e paradero di Benjamina pa mèldu esaki mesora via 911 -715 8000 òf via nos liña di tep anónimo 717 7251.
Bo a mira algu sospechoso? Yama 717 8000 òf e liña di tep anónimo 717 7251.
