Number di emergensia: 911 Liña di tep di Polis: 9310

Notisia di polis di djabièrnè 10 di desèmber te ku djaluna 13 di desèmber 2021

Adaptá pa último biaha riba:

Kralendijk - Bròmer ta drenta mondi Den oranan di anochi, alrededor di 9.35 or, riba djadumingu 12 di desèmber, sentral di polis a risibí notifikashon tokante aksidente ku un bròmer riba Kaminda Sorobon. Pa motibu deskonosí e shofùr a sali for di un bògt i a bai resultá den mondi. Ambulans a transporte pa hospital pa tratamentu médiko.

Skuter enbolbí den “hit & run”

Alrededor di 8 or di anochi, riba djadumingu 12 di desèmber, a drenta notifikashon a drenta sentral di polis ku un “hit & run” a tuma lugá riba Kaya Internashonal. Na yegada di patruya na e sitio shofùr di un skuter a deklará ku e tabata koriendo riba Kaya Internashonal. Un pikòp ku tabata biniendo for di Bulevar Julio A. Abraham a kue un bògt demasiado grandi na e krusada T ku ta konektá e dos kareteranan aki ku otro, pa kore subi Kaya Internashonal. Shofùr di e skuter mester a desviá pero tòg e pikòp a alkanse dor di kua el a kai. E pikòp a sigui kore bai. Ambulans a transportá shofùr di skuter pa hospital pa kòntròl médiko.

 

Detenshon pa maltrato

Den oranan di mardugá di djadumingu 12 di desèmber a detené un hòmber di inisial B.J.F. 55 aña di edat, en konekshon ku menasa, maltrato ku un arma i intento di asesinato. E sospechoso a maltratá un hòmber ku un harpun na un kas situá na Kaya Blenchi i despues a bai ku un outo di marka Hummer. A top’e i a detené na Kaya Linda. A konfiská e harpun pa investigashon mas aleu. Ambulans a transportá e víktima pa hospital pa tratamentu médiko.

 

Bus enbolbí den aksidente
Alrededor di 10.50 or di anochi, riba djasabra 11 di desèmber, un aksidente ku un bus a tuma lugá riba Kaminda La Union. Ambulans a transportá shofùr di e bus pa hospital pa tratamentu médiko. Kousa di e aksidente no ta konosí.

 

Molèster di kachó

Wikènt tras di lomba tabatin diferente notifikashon tokante molèster di kachó. Ta trata aki di kachónan ku ta kana los i ta sòru pa molèster pa habitantenan den besindario, kachónan agresivo ku ta ataka hende, etc.

A papia ku doñonan di kachónan. Den un kaso ‘dierenbescherming’a konfiská un kachó agresivo komo ku e tabata ataka hende.

 

A detené shofùr di ‘quad’

Den oranan di mardugá  di djasabra 11 di desèmber a para shofùr di un ‘quad’ pa kòntròl rutinario. A resultá ku e tabata bou di influensia di alkohòl i a detené pa manehá bou di influensia di alkohòl. Na warda di polis a hasi un análisis di rosea. En konekshon ku e resultado di e análisis di rosea, el a haña un prohibishon pa manehá di 11 ora i a tuma su reibeweis. 

 

Kiebro den kas

Riba djabièrnè 10 di desèmber a drenta keho di kiebro den un kas situá na Kaya C.E.B. Hellmund. Entre 6.15 or di atardi i 10.15 or di anochi, deskonosínan a drenta e kas via di e bentana di baño I a bai ku Apple Macbook shinishi, un lèptòp pretu di marka Acer, un lèptòp shinishi di marka HP ku su kargadó, un vèrekèiker pretu di marka Zeiss i sèn kèsh. Ta investigando e kaso.

 

Atrako di dia kla

Alrededor di 4 or di atardi riba djabièrnè 10 di desèmber, sentral di polis a risibí notifikashon tokante un atrako na Alta Mira na Rincon. Un hòmber, armá ku un kuchú, a sorprendé e víktimanan i a pidi nan pa entrega nan bienes. E sospechoso a bai ku un tas di lomba ku, komo kontenido, dos telefòn i un pòtmòni. E kaso ta bou di investigashon.

 

Bo a mira algu sospechoso? Yama 717 8000 òf e liña di tep anónimo 717 7251.