Notisia di polis di djabièrnè 24 di desèmber te ku djaluna 27 di desèmber 2021

Maltrato den Centrumgebied

Alrededor di 12.25 or di mardugá riba djaluna 27 di desèmber un kaso di maltrato a tuma lugá den Centrumgebied. Un grupo di hòmber a maltratá un hòmber ku a bai atendé ku algun persona ku tabata kousando molèster di muzik duru dilanti di su kas. E víktima a sufri leshon na su kabes, kara i garganta a konsekuensia di esaki. Ta investigando e kaso.

 

Manehá bou di influensia

Riba djadumingu 27 di desèmber, alrededor di 1 or di mardugá a para un pikòp riba Kaya Korona pa kòntròl. E shofùr, un hòmber di inisial S.A.B.V. di 52 aña di edat, a resultá di tabata bou di influensia di alkohòl i a detené pa manehá bou di influensia di alkohòl.

 

Kandela

Den oranan di mainta riba djadumingu 26 di desèmber, sentral di polis a risibí notifikashon tokante kandela den besindario di Kaminda Sorobon. Aki tabata trata di un pida mondi ku tabata na kandela. Brantwer a paga e kandela i no tabatin herido.

 

Detenshon

Riba djadumingu 26 di desèmber, alrededor I 5.30 or di mainta a detené un muhé di inisial R.S. di 29 aña di edat riba Kaya Internashonal en konekshon ku insulto di ámtenar den funshon, manehá bou di influensia di alkohòl i resistensia durante di detenshon. En konekshon ku un notifikashon tokante un outo ku tabata kore zeilu riba kaminda a para i kontrolá e shofùr. Durante di esaki e sospechoso a insultá e agentenan polisial i tabata mustra komportashon agresivo.

 

Pèrsekushon ta finalisá ku aksidente

Durante di un pèrsekushon den oranan di mardugá riba djadumingu 26 di desèmber,un aksidente entre un outo di polis i outo di e sospechoso a tuma lugá. E sospechoso a neglishá señal pa para di un patruya dor di kua a inisiá un pèrsekushon pa kua e patruya a pidi asistensia. E patruya ku a bai asistí a topa ku e outo sospechoso riba Kaya Tapajos kaminda nan a dal frontalmente den otro. A detené e shofùr di inisial D.L.L. di 26 aña di edat.

 

 

 

 

Establesimentu nokturno ta violá medidanan vigente en konekshon ku Covid

Polis a sera un establesimentu nokturno situá den Centrumgebied riba djasabra 25 di desèmber komo ku e a violá e medidanan vigente en konekshon ku Covid. Un artista tabata presentá den e establesimentu.

 

Polis a risibí informashon ku un artista a keda di presentá den e lokalidat. En konekshon ku esaki a avisá doño di e establesimentu for di den trempan di anochi ku esaki no por i a informe un biaha mas di e reglanan vigente en konekshon ku Covid:

1. Na un evenementu paden no mag tin mas di 100 persona presente;
2. Na un evenementu no mag baila ni kanta;
3. Mester kumpli ku e 1,5 meter di distansia.

 

Algu mas lat a resultá ku tabatin bailamentu i kantamentu den e establesimentu, durante di kua no tabata kumpli tampoko ku e 1,5 meter di distansia. Tambe tabatin mas di 200 persona presente den e establesimentu ku a paga pa e presentashon. A sera e establesimentu mesora i e doño a haña un prosèsferbal.

 

Den e mardugá anterior, di 25 di desèmber a konstatá alrededor di 12.40 or ku ainda tabata laga hende drenta e establesimentu, ku tabata tokando muzik ainda i ku tabata bende bebida alkohóliko. Polis a sera e establesimentu i tabatin alrededor di 55 persona presente ku tabata sali di e entrada di dilanti I di patras ora a sera e lugá. E doño a haña un prosèsferbal pa no a kumpli ku e medida vigente de sera pa 12 or di mardugá.

 

Aksidente fatal

Riba djasabra 25 di desèmber, alrededor di 6.45 or di mainta un aksidente a tuma lugá riba Kaminda Lagun. Shofùr di un outo ku tabata biniendo for di direkshon di Lagun, a pèrdè kòntròl den un bògt i a bai dal den un palu. Na yegada di ambulans e shofùr no tabata dunando señal i algun ratu despues a konstatá ku el a bin fayesé. Ta trata di un dama di inisial T.D.J.F. nasé riba 21 di desèmber 2000 na Hulanda.

 

Outo a bòltu

Riba djabièrnè 24 di desèmber, alrededor di 11.30 or di anochi un aksidente a tuma lugá riba Kaya Piedra Presioso. Un outo a bai desviá pa kabritu, hasiendo esaki a pèrdè kòntròl I e outo a bai bòltu. E shofùr tabata ileso i e mes a sali for di e outo.

 

Bo a mira algu sospechoso? Yama 717 8000 òf e liña di tep anónimo 717 7251.