Notisia di polis di djabièrnè 3 di desèmber te ku djaluna 6 di desèmber 2021
Kralendijk - Skuter konfiská - Den oranan di mardugá riba djadumingu 5 di desèmber a konfiská un skuter durante un kòntròl di tráfiko. A para e shofùr riba Kaya Internashonal dor ku e no tabatin hèlm bisti. Despues di kòntròl mas aleu a resultá ku e no tabatin reibeweis ni seguro bálido tampoko.
Kontrol riba medidanan vigente di COVID-19
Den oranan di mardugá di djasabra 4 i djadumingu 5 di desèmber, a tene kòntròl den kuadro di e medidanan vigente en konekshon ku covid-19.
Alrededor di 1.30 or di mardugá di 3 pa 4 di desèmber, despues di un kòntròl na Pink Bich a para un pikòp pa kòntròl na altura di Te Amo Bich. Durante di e kòntròl a bin topa ku un tas ku ‘lachgas’, blas, dos portofon i un djùg yená ku bòter di bebida alkohóliko. E shofùr i pasahero ta konosí di ta bende ‘lachgas’ i bebida alkohóliko na fiestanan ilegal. E shofùr no por a mustra un reibeweis bálido tampoko. Pa esaki el a haña un prosèsferbal. A konfiská e outo, e artíkulonan hañá i sèn kèsh.
Algu mas lat, alrededor di 2:15 or di mardugá un patruya a topa un outo ku tabata kore den direkshon kontrali den e rotònde di misa. A intentá pa para e outo pero e shofùr no a duna oido na esaki i a purba sigui kore bai dor di kua el a bai dal den un palu di lus.
Den Centrumgebied a papia ku algun persona komo ku nan tabata okashoná molèster di muzik. Riba Kaya Korona a para un outo ku 6 okupante pa kòntròl. Durante di e kòntròl a topa ku algun saku ku un supstansia blanku paresido na kokaina. A konfiská i a destruí esakinan.
Aksidente ku bròmer
Alrededor di 1 or di mardugá riba djadumingu 5 di desèmber, sentral di polis a risibí notifikashon tokante un aksidente ku un bròmer den Centrumgebied. Pa motibu ainda deskonosí, shofùr di e bròmer a kai. E shofùr no por a mustra reibeweis ni seguro bálido. Dor di esaki a hiba e bròmer warda te ora ku e doño por mustra e papelnan bálido.
Maltrato ku arma
Den oranan di anochi, pa mas o ménos 9.40 or di djasabra 4 di desèmber, a detené un hòmber di inisial D.D.D.G. di 27 aña na Kaya Bongo pa maltrato ku un arma. E sospechoso a dal un hòmber ku kabu di un pistol. A konfiská e outo i telefòn selular di e sospechoso.
Outo a bòltu
Den oranan trempan di atardi di djasabra 4 di desèmber, un patruya a bin topa ku un outo mei mei di baranka kantu di kaminda den besindario di e kasnan di katibu blanku. E shofùr i e pasahero mes a gatia sali for di e outo. E okupantenan a deklará ku nan tabata biniendo for di direkshon di saliña na momentu ku diripiente e shofùr a pèrdè kontrol ku konsekuensia ku nan a bòltu. E shofùr tabatin un reibeweis Dominikano i un ID Boneriano kaduká. E pasahero no tabatin ID huntu kuné. Personal di KMar tambe a bin na e sitio i a sigui tende tokante e dokumentunan nesesario i asuntu di estadia. Despues di esaki ambulans a transportá ámbos pa hospital pa tratamentu médiko.
Kiebro den akomodashon turístiko
Riba djasabra 4 di desèmber a drenta keho di kiebro den un akomodashon turístiko situá na Bulevar E.E.G. Entre 12.30 or i 5 or di mardugá, deskonosínan a bai ku entre otro un pòtmòni pretu ku vários tarheta, sèn kèsh i un pasport komo kontenido, un lèptòp pretu di marka Dell, ekipo di GoPro 10, un tas di man kolo ros di marka Michael Kors ku vários tarheta i sèn kèsh komo kontenido, un tas di lomba kolo bèrdè ku blanku ku komo kontenido un kámara koló pretu di marka Nikon i un pasport, un lèptòp kolo di plata di marka Apple, un tablet di marka Amazon koló pretu, un kámara GoPro koló pretu, un telefòn selular ‘google pixel’ i un tablet Samsung Galaxy A7. Ta investigando e kaso.
Detenshon pa manehá bou di influensia
Riba djabièrnè 3 di desèmber a detené un hòmber di inisial J.P.C. di 44 aña na Kaya Inca pa manehá bou di influensia di alkohòl. Despues di a risibí notifikashon ku un outo tabata mustra komportashon deskabeyá riba karetera, a para e shofùr di e outo pa a papia kuné tokante e komportashon aki. Durante e kombersashon a resultá ku e tabata kompletamente bou di influensia di alkohòl i a detené.
Outo na kandela
Den oranan di mainta riba djabièrnè 3 di desèmber, sentral di polis a risibí notifikashon ku tabatin un outo na kandela den Kaya Den Haag. Esaki tabata forma peliger pa hendenan den besindario. Na yegada di patruya a resultá ku e kandela tabata bin for di tapa di mashin di e outo ku tabata stashoná dilanti di un kas. A evakuá habitantenan di kas i apartamentunan den besindario pa nan mes seguridat. Dos outo di brantwer a akudí na e sitio i a paga e kandela. Doño di e outo a deklará ku nèt un luna promé el a kaba hiba e outo garashi pa un servisio grandi. Na dado momentu na a mira huma sali for di e tapa di mashin despues di kua e kandela a surgi. No tabatin herido.
Bo a mira algu sospechoso? Yama 717 8000 òf e liña di tep anónimo 717 7251.
