Notisia di polis di djabièrnè 31 di desèmber 2021 te ku djaluna 3 di yanüari 2022

Aksidente ku skuter

Den oranan di mainta riba djadumingu 2 di yanüari, un aksidente ku un skuter a tuma lugá riba Kaya Gilberto F. Croes. Shofùr di e skuter a deklará ku e tabata koriendo tras di un outo bayendo den direkshon di Playa, na momentu ku e outo diripiente a lora na su man robes, loke a pone ku e shofùr di e skuter mester a wanta brek di manera abrupto i el a kai. Un amiga di e víktima ku ta verplegster a busk’e i hib’e hospital pa tratamentu médiko.

 

Outo ta resultá den mondi

Riba djasabra promé di yanüari, un aksidente a tuma lugá alrededor di 10.20 or di anochi riba e krusada di Kaya Industria I Kaya Maximiliana Rosario. E shofùr a deklará ku e no a realisá ku el a yega na e krusada i a sigui kore drenta mondi. El a resultá di tabata bou di influensia di alkohòl, a detené i dun’e un prosèsferbal pa manehá bou di influensia di alkohòl. Ta trata di un hòmber di inisial R.R.J. di 27 aña di edat. E i e pasahero tur dos tabata ileso.

 

Violashon di Lei di deber di Identifikashon

Riba djasabra promé di yanüari sentral di polis a risibí notifikashon tokante un kaso di bringamentu na un bar situá na Kaya Korona. Na yegada di patruya tabatin solamente un hòmber presente ku tabata enbolbí den e bringamentu. Na momentu ku a pidié pa identifiká su mes, el a nenga esaki. Komo ku e tabata hasi fèrfelu ku doño di e bar tambe, a detené pa buracheria públiko i pa violashon di Lei di deber di Identifikashon. Ta trata di un hòmber di inisial M.G.R. di 37 aña di edat.

 

Detenshon pa buracheria públiko

Alrededor di 8.15 or di anochi riba djasabra promé di yanüari, a detené un hòmber di inisial M.H.A.M. di 37 aña na Kaya Seminole pa buracheria públiko. A topa kuné tras di stür miéntras e tabata konsumiendo bebida alkohóliko. Ora a atendé kuné tokante esaki, el a kuminsá hasi difísil kontra di e agentenan i a detené. Tambe el a haña prohibishon pa manehá pa 8 ora.

 

Detenshon pa menasa ku morto

Den oranan lat di atardi riba djasabra  promé di yanüari, a detené un hòmber di inisial J.F.R.F. di 38 aña na Rincon. E sospechoso a menasa dos persona, bou di kua un mucha, ku morto miéntras e tabatin un kuchú den su man.

 

Kandela na Kaya Amsterdam

Alrededor di 5.20 or riba djasabra promé di yanüari, sentral di polis a risibí notifikashon tokante kandela den kura di un kas situá na Kaya Amsterdam. Den e kura tabatin un mashin pa koba den besindario di kandela. Brantwer a akudí na e sitio i a paga e kandela. No tabatin herido. Kousa i e kandela no ta konosí.

 

Atrako di dia kla

Riba djasabra, promé di yanüari, alrededor di 5 or di atardi un atrako a tuma lugá na Kaya Comanche kaminda a bai ku entre otro outo di e víktima. Despues di un investigashon kòrtiku a logra detené un hòmber di inisial C.D.A. di 20 aña di edat. A haña e outo bèk. Investigashon den e kaso aki ta andando.

 

Detenshon pa maltrato

Den oranan trempan di atardi riba djasabra promé di yanüari, a detené un hòmber di inisial L.D.v.P. di 24 aña na Kaya Nikiboko Sùit pa maltrato.

 

Tirunan di atvertensia den Centrumgebied

Alrededor di 4 or di mardugá riba djasabra promé di yanüari, sentral di polis a risibí notifikashon ku tabatin un kaso di bringamentu den Centrumgebied. Na momentu ku patruya a akudí a tira un asina yamá 'bombshell' ku a eksplotá bou di un di e outonan di polis. Banda di esaki a tira mas vürwèrk. E agentenan a sinti nan seriamente menasa i den peliger. Na e momentu ei algun agente a uza nan arma reglamentario pa lòs algun tiru di atvertensia. Ambulans a akudí na e sitio pa atendé ku un persona ku a sufri leshon durante di e bringamentu ku a tuma lugá promé ku polis a yega. A transport’é pa hospital pa tratamentu médiko. Investigashon di e suseso ta andando.

 

Persekushon ku detenshon

Alrededor di 3 or di mardugá riba djasabra promé di yanüari, un persekushon kòrtiku a tuma lugá for di Hanchi di Amboina despues ku shofùr di un outo a nenga para ora a orden’é pa hasi esaki pa un kòntròl. A logra blòkia e outo na Kaya Flor de Cuba dor di finalmente el a para. E pasahero di e outo a baha i a kuminsá mustra komportashon agresivo. Seguidamente a detené. Durante di su detenshon el a resistí pisa. A detené e hòmber aki di inisial W.R.P di 18 aña en konekshon pa neglishá òrdu di polis I pa resistensia ku menasa. A detené e shofùr, un hòmber di inisial B.A.S. di 18 aña pa neglishá òrdu di polis.

 

Kandela na diferente sitio

Riba djasabra promé di yanüari sentral di polis a risibí vários notifikashon di kandela den oranan di mardugá. Den Kaya Grandi tabatin kaha na kandela den porta di un pakus, loke a pega e porta tambe na kandela. Na yegada di patruya e doñonan mes a paga e kandela. Den un kunuku den besindario di Bario Mexico tabatin un pida mondi grandi na kandela. Brantwer a paga e kandela. Riba e krusada di Kaya Andres A. Emerenciana i Kaya Viol tabatin un mondi grandi na kandela  brantwer a akudí na e sitio i tabatin e kandela rápido bou di kòntròl. Na Kaya Pilon a konstatá kandela paden di un kas. Na yegada di patruya e kandela tabata algu chikitu i a page mesora. No tabatin herido. Na Kaya Caribe vürwèrk ku aksidentalmente a rementá paden di un kas a sende kortinanan na kandela. Brantwer a paga e kandela mesora. No tabatin herido.

 

Bo a mira algu sospechoso? Yama 717 8000 òf e liña di tep anónimo 717 7251