Notisia di polis di djaluna 6 di desèmber te ku djárason 8 di desèmber 2021
Kralendijk - Shofùr di skuter ta kai - Riba djamars 7 di desèmber, alrededor di 5.35 or di atardi, un aksidente ku un skuter a tuma lugá riba Bulevar E.E.G. Pa motibu deskonosí e shofùr a kai for di e skuter. A transporte ku ambulans pa hospital pa tratamentu médiko.
Kiebro den akomodashon turístiko
Riba djaluna 6 di desèmber a drenta keho di kiebro den un akomodashon turístiko situá na Punt Vierkant. Entre 7.30 or i 10.45 or di anochi, deskonosínan a drenta e kas dor di kibra un bentana. E malechornan a bai ku entre otro un televishon, un ‘playstation’, paña, un seif i algun artíkulo mas di balor. Nan a bai tambe ku un pikòp kolo blanku di marka Nissan, modèl Frontier, numerá V-5181. Ta investigando e kaso.
Kimamentu di sushi
Den oranan lat di atardi riba djaluna 6 di desèmber sentral di polis a risibí notifikashon tokante molèster di huma den besindario di Kaya Grandi. Na yegada di patruya a resultá ku tabatin un persona ta kimando sushi na un kas den besindario. E kandela tabata bou di kòntròl pero tabata kousa hopi molèster di huma pa tráfiko riba Kaya Grandi. A ordená e habitante pa paga e kandela i el a haña un aviso.
Kandela den mondi
Alrededor di 3.40 or di atardi riba djaluna 6 di desèmber sentral di polis a haña notifikashon ku tin un kandela den un mondi den besindario di Kaya Pueblo. A resultá ku ta yerba tabata na kandela. Brantwer a paga esaki.
Molèster di vehíkulo den bario
Polisnan di bario a nota ku tin basta molèster kousa dor di vehíkulonan ta tuma lugá den barionan. En konekshon ku esaki paso a paso lo kuminsá ku kòntròl mas intensivo den barionan residensial. E barionan Nort Saliña, Hato, Nawati i Santa Barbara, ku ta kai bou di polis di bario Claudette Raphaela, lo ta na turno promé.
E barionan Playa Pariba/ Playa Pabou i Centrumgebied (Eugene Granviel), Belnem, Punt Vierkant, Sabal Palm, La Palma, Tera Kòrá (Ronald Schleper), Rincon, Tras di Montaña, Sabadeco (Victoriano Statie), Amboina, Bario Mexico i Den Stashi (Lee Anthony) lo sigui despues.
Bo a mira algu sospechoso? Yama 717 8000 òf e liña di tep anónimo 717 7251.
