Notisia di polis di djaluna 11 di aprel te ku djárason 13 di aprel 2022
Kralendijk - Aksidente frontal entre tres vehíkulo - Riba djamars 12 di aprel alrededor di 10 or di anochi un aksidente entre tres vehíkulo a tuma lugá na entrada di Rincon na altura di Mangazina di Rei. Un vehíkulo ku tabata bayendo den direkshon di Rincon a pèrdè kòntròl i bai dal frontal den e vehíkulo ku tabata bin di direkshon kontrali ku tabata bayendo den direkshon di Playa. E terser vehíkulo ku tambe tabata enbolbí den e aksidente por a desviá nèt na tempu i a keda ku daño solamente na e banda robes di e outo. Ambulans a bai ku tres okupante, dos dama i un hòmber, hospital pa tratamentu médiko. Situashon di e hòmber tabata kritiko. Departmentu di tráfiko ta investigando.
Sambuyadó pèrdí
Riba djamars 12 di aprel sentral di polis a risibí notifikashon ku tabatin un sambuyadó tabata pèrdí na sitio di sambuya Red Slaves. Un grupo a bai sambuyá i ora nan a sali for di awa tabata falta un hende. Algu mas lat e hòmber pèrdí a bin ariba den awa. El a deklará ku el a kere ku su yu i su kas a bai kantu bek i el a sigui sambuyá numa. A atvertí nan pa otro biaha nan keda huntu durante ku ta sambuyá.
Detenshon
Den oranan di mainta riba djamars 12 di aprel a detené un hòmber di inisial A.G.M. en konekshon ku menasa ku morto i maltrato ku un arma.
Detenshon
Den oranan di mardugá riba djamars 12 di aprel a detené un muhé di inisial I.E.d.l.S. di 33 aña en konekshon ku intento di asesinato. E sospechoso a hinka un hòmber ku kuchú.
Mucha muhé pèrdí
Alrededor di 5.40 or di atardi riba djaluna 11 di aprel sentral di polis a risibí notifikashon ku tin un hobensita di 17 aña ku tabata pèrdí. Despues di un búskeda kòrtiku i yamada via prensa a haña e hobensita bek sano i salvo.
Bo a mira algu sospechoso? Yama 717 8000 òf e liña di tep anónimo 717 7251.
