Notisia di polis di djárason 13 di aprel te djárason 20 di aprel 2022
Kralendijk - Turista ta fayesé - Riba djamars 19 di aprel den oranan di mèrdia alrededor di 1.30 or a drenta notifikashon di un kurpa sin bida na Klein Bonaire. Mesora agentenan di Kuerpo Polisial a sali ku yudansa di Wardakosta pa Klein Bonaire. Akinan trahadónan di e departamentu forensiko a inisiá un investigashon mesora. Ta trata un dama turista di 84 aña di edat ku lo mester a hoga na momentu ku e tabata snòrkel na Klein Bonaire.
Entrada hudisial
Riba djamars 19 di aprel un entrada hudisial a tuma lugá den un kas situá na Antriol. E entrada hudisial tabata den kuadro di Lei di Opio BES. Durante di e entrada hudisial a topa ku un kantidat di droga i a konfiská esakinan pa mas investigashon. A detené un hòmber di inisial J.J.G.R. di 43 aña di edat en konekshon ku violashon di Lei di Opio BES.
Detenshon pa manehá bou di influensia
Den oranan di mardugá riba djadumingu 17 di aprel a detené un hòmber di inisial W.S.C. di 52 aña riba Kaya Mendelsson. A para e sospechoso pa kòntròl dor ku su outo no tabatin lus di patras. Durante di e kòntròl e sospechoso no por a mustra ni un reibeweis ni prueba di seguro bálido i probablemente tabata bou di influensia. A lag’e hasi un ‘blaastest’ ku konsekuensia ku a detené pa manehá bou di influensia. A konfiská e outo te ora ku e sospechoso por mustra un reibeweis i prueba di seguro bálido.
Aksidente entre dos skuter
Alrededor di 2.30 or di mardugá di djasabra 16 di aprel, un aksidente entre dos skuter a tuma lugá riba Bulevar E.E.G. un skuter a dal patras di e otro dor di kua tur dos shofùr a kai. Shofùr di e skuter ku tabata mas dilanti a deklará ku e mester a wanta brek diripiente na momentu ku e outo ku tabata koriendo su dilanti tambe a wanta brek diripiente. Personal di ambulans a trata ámbos persona na e sitio mes.
Ladronisia di skuter
Riba djabièrnè 15 di aprel a drenta keho di ladronisia di un skuter kolo kòrá ku pretu, di marka Yamaha. Den siá di e skuter tabatin un tas di lomba ku komo kontenido entre otro paña, brel di sambuyá, un iPhone 11 kolo bèrdè, un brel di solo di marka Oakley, un brel di solo di marka Ocean Specs i sèn kèsh. E skuter tabata stashoná na Wilhelmina plein i entre 8.30 or di anochi i 12.30 or di mardugá deskonosínan a bai kuné. Ta investigando e kaso.
Outo ta bòltu
Alrededor di 8.15 or di anochi, sentral di polis a risibí notifikashon ku un outo a bòltu na kaminda di Saliña nèt despues di Salt Company. Pa motibu deskonosí e outo a bòltu. Ambulans a transportá shofùr di e outo hòspital pa tratamentu médiko.
Maltrato ta finalisá den aksidente
Alrededor di algu promé ku 10.30 or di nochi riba djárason 13 di aprel, sentral di polis a risibí notifikashon ku un pikòp a bòltu na Kaya Corantijn. Algu mas promé shofùr di e pikòp aki mester a maltratá un persona na un bar situá riba Kaya Nikiboko Sùit i a subi e pikòp bai aksidentá. Ambulans a transportá shofùr di e pikòp pa hospital pa tratamentu médiko. Probablemente e tabata bou di influensia di alkohòl. A transportá e víktima di maltrato tambe ku ambulans pa hospital pa tratamentu médiko. Investigashon den e kaso ta andando.
Bo a mira algu sospechoso? Yama 717 8000 òf e liña di tep anónimo 717 7251.
