Number di emergensia: 911 Liña di tep di Polis: 9310

Notisia di polis di djárason 30 di mart te ku djaluna 4 di aprel 2022

Adaptá pa último biaha riba:

Kralendijk - Aksidente entre outo i skuter - Den oranan di anochi di djadumingu 3 di aprel un aksidente entre un outo i un skuter a tuma lugá riba Kaya Boneiru. Shofùr di e skuter tabata manehando riba Kaya Boneiru, kual ta un ‘éénrichtingsweg’, bayendo den direkshon di Kaya Grandi. Shofùr di e outo tabata biniendo di direkshon kontrali, pues manehando den direkshon robes i a bin dal den e skuter. Ambulans a transportá shofùr di e skuter pa hospital pa tratamentu médiko. A detené shofùr di e outo pa manehá bou di influensia di alkohòl i a bai kuné warda pa un análisis di rosea. A konsekuensia di resultado di esaki a kita su reibeweis.

Ladronisia di skuter
Riba djasabra 2 di aprel a drenta keho di ladronisia di un skuter. E skuter tabata stashoná riba e sitio di stashoná di un akomodashon turístiko situá na Bulevar Julio A. Abraham. Entre 31 di mart i promé di aprel, deskonosínan a bai ku e skuter pretu di marka Kymco, numerá MF-329. Ta investigando e kaso.

Detenshon den Centrumgebied
Den oranan di mardugá riba djasabra 2 di aprel polis a hañ’e obligá pa aktua ku  man duru kontra un sospechoso i algun personanan presente den Centrumgebied en konekshon ku violensia públiko. Durante di detenshon di e sospechoso, ku tabata enbolbí de un kaso di bringamentu, tantu e sospechoso komo algun di esnan presente a kuminsá bringa ku polis i no tabata duna oido na e vários yamada di polis pa hala atras i koperá. Mirando e diferente menasanan i e situashon peligroso ku e agentenan polisial tabata aden, e agentenan a haña nan obligá di hasi uzo di nan arma reglamentario pa a los tiru di atvertensia i tambe a uza ‘pepperspray’. Uzo di esakinan semper ta e último rekurso mirando ku nan por tin un impakto hopi grandi. Na momentu ku a hasi uso di e ‘pepperspray’ un aspirante (agente den treinen) tambe a haña ‘pepperspray’ den su wowo. E sospechoso detené ta un hòmber di inisial S.H.R. di 24 aña di edat. A detené pa no duna oido na òrdu di polis, pa no tin identifikashon bálido riba dje i pa kousa peliger riba karetera públiko.

Mas i mas ta e kaso ku ta hendenan presente ta  stroba polis su trabou riba kaya durante ke ta ehersé su tareanan. Esaki ta sòru pa eskalashon innesesario i ta un echo kastigabel. Nos ta komprondé e ku emoshonnan por eskala durante di un detenshon òf aktuashon di polis. Sinembargo ta tarea di polis pa sòru órden públiko i seguridat. Dor di mete, komo siudadano,  durante un detenshon òf durante di kualke otro akshon di polis, tin chèns ku situashonnan peligroso por surgi. P’esei tambe nos ta hasi un yamada pa atendé ku esaki di manera konsiente i adekuá.

Detenshon pa maltrato
Riba djaweps 31 di mart a detené un hòmber di inisial C.A.M.C. di 29 aña en konekshon ku maltrato ku un arma. E sospechoso a maltratá un hòmber ku un bòter di serbes durante di un bringamentu na un kas situá na Kaya Regina. Ambulans a transportá e víktima pa hospital pa tratamentu médiko.

Kòntròl di tráfiko plania
Riba djárason 30 di mart, den oranan di atardi, a tene kòntòl di tráfiko plania riba Kaya Internashonal i riba Kaya Amsterdam.

Durante di e kòntròlnan aki a duna prosèsferbal pa lo siguiente:
9x pa manehá sin reibeweis
7x pa manehá sin seguro bálido
44x pa manehá sin faha di seguridat bisti
6x pa uza telefòn durante ku ta manehá
1x pa manehá sin stul pa mucha

Bisti bo faha pa bo mes seguridat. Un faha di seguridat  ta un faha ku ta protehá okupante di un outo durante di un aksidente. Dor di e faha e persona protehá ta keda sinta riba su stul, no ta dal su kabes den winshil i no ta keda bentá den e outo p’aki p’aya. Dor di bisti bo faha di seguridat bo chèns di tin un aksidente mortal ta baha ku 30 pa 40%. Tambe patras den outo bo tin 20% ménos chèns di keda herida seriamente ora bo tin bo faha bistí.

Si bo no tene bo mes na e reglanan, bo por haña un but. E suma pa kore sin faha di seguridat bistí ta $110.

Dos kaso di hogamentu riba mesun dia
Riba djárason 30 di mart, alrededor di 12:25 or di mèrdia, sentral di polis a risibí notifikashon ku a topa un sambuyadó den pèrta den laman den besindario di Saliña. Un piskadó a topa ku a sambuyadó.  A hiba e víktima kantu kaminda personal di ambulans mesora a kuminsá ku reanimá, pero esaki tabata en bano. Ta trata di un turista maskulino di inisial W.C.M.T. nase 27 di yanüari 1954. E defuntu tabata sambuyando ku dos amigu.

Algu mas lat, alrededor di 1 or di mèrdia, un otro notifikashon di un kaso di hogamentu a drenta. Un hòmber tabata snòrkel ku un amigu na Klein Bonaire. Diripiente e amigu a kai den un pániko i e hòmber a purba hib’e kantu. Un boto ku tabata pasando a duna asistensia i a kuminsá reanimá riba e boto. Personal di ambulans a tuma ofer ora a yega kosta, pero esaki tabata en bano. E turista maskulino di inisial A.M.J., nase riba 10 di ougùstùs 1976, a bin fayesé. KMar i Wardakosta a asistí KPCN den e kaso lamentabel aki.

A detené hòmbernan
Riba djárason 30 di mart a detené un hòmber di inisial J.E.A. di 44 aña i un hòmber di inisial K.D.Q.A. di 18 aña di edat. A para un di e hòmbernan pa un kòntròl komo e tabata manehando un bròmer sin hèlm bisti. E bròmer no tabatin plachi di number tampoko. Despues di kòntròl mas aleu a resultá ku e no tabatin su reibeweis ni un prueba di seguro huntu kuné. Dor di esaki a disidí pa bai ku e bròmer warda. Na momento ku tabata takel e bròmer pa bai kuné, e shofùr i e otro sospechoso a kuminsá resistí i a menasa pa tira polisnan ku piedra. Durante di nan detenshon e hòmbernan a sigui duna resistensia i menasa e agentenan dor di kua e agentenan a haña nan obligá di uza ‘pepperspray’. Shofùr di e bròmer a haña un prosèsferbal tambe.

Bo a mira algu sospechoso? Yama 717 8000 òf e liña di tep anónimo 717 7251.