Notisia di polis di djárason 3 di ougùstùs te ku djabièrnè 5 di ougùstùs 2022
Kralendijk - Kiebro den kas Riba djabièrnè 5 di ougùstùs a drenta keho di kiebro den un kas situá na Kaya Inca. Entre 7 or di anochi di djaweps 4 di ougùstùs i djabièrnè 5 di ougùstùs 4.15 or di mardugá, deskonosínan a kibra drenta e kas i a bai ku entre otro un oloshi i un armbant di oro. Ta investigando e kaso.
Aksidente entre outo i skuter
Den oranan di anochi riba djaweps 4 di ougùstùs sentral di polis a risibí notifikashon tokante un aksidente entre un outo i un skuter riba Kaya Grandi. Shofùr di e outo a deklará ku e tabata koriendo den direkshon di Playa, i no a mira e skuter, ku tabata para pa kita na su man robes, na tempu i bai dal den dje. Ambulans a transportá shofùr di e skuter pa hospital pa tratamentu médiko.
Kiebro na Crown Ridge
Riba djárason 3 di ougùstùs a drenta keho di kiebro den un kas situá na Crown Ridge na Sabadeco. Entre 6.15 or di atardi i 8 or di anochi, deskonosínan a forsa un bentana di e kas pa a drenta i a bai ku entre otro un lèptòp di marka Lenovo, un telefòn selular di marka Motorola, un iPad, un ‘headphone’ di marka Bose, un pòtmòni ku vários tarheta, vários joya, un oloshi di marka Tag Heuer i un Apple Mac ku su kargadó. E kaso ta bou di investigashon.
