Notisia di polis di djabièrnè 13 di mei 2022 te ku djaluna 16 di mei 2022

But
Entre djabièrnè 13 di mei 2022 i djasabra 14 di mei 2022, a duna tres but pa entre otro manehá sin reibeweis.

Aksidente
Riba djasabra 14 di mei 2022 alrededor di 3:40’or di mardugá sentral di polis a risibí notifikashon di aksidente riba Kaya International na altura di Marriott. E vehíkulo ku tabata envolví den e aksidente unilateral a dal kontra un palu di lus. Shofùr di e vehíkulo a risibí leshon na su kara i brasa i ku ambulans a transport’é pa hòspital pa tratamentu médiko avansá. CRS, WEB i departamento di tráfiko di polis a presentá na e sitio. Departamento di tráfiko di polis ta sigui investigá e aksidente mas aleu.

Sambuyadó den problema
Riba djasabra 14 di mei 2022 alrededor di 4:50’or di atardi sentral di polis a risibí notifikashon di un sambuyadó ku tabata pèrdí pa mas ku 15 minüt. E sambuyadó pèrdí tabata sambuyá ku dos otro persona den bisindario di Alice in Wonderland. Despues ku e dos sambuyadónan a pèrdè e di tres sambuyadó for di bista, a bati alarma i yama polis. Polis na su turno a pone Koninklijke Marechaussee, Duana i Wardakosta, na unda a ehekutá un búskeda na e sitio kaminda a mira e sambuyadó último. Mas o ménos mei ora despues ku a mèldu e sambuyadó pèrdí na polis a mira i enkontrá e sambuyadó na kosta.

Kandela den mashin pa traha asfalt
Riba djadumingu 15 di mei 2022 alrededor di 7:15’or di mainta sentral di polis a risibí dos notifikashon di kandela den un mashin pa traha asfalt. E kandela a ekstendé for di e mòfler di e mashin pa produsí asfalt pa e tanki di kombustibel. Kuerpo di bombero a presentá na e sitio i a paga e kandela.

Aksidente
Djadumingu 15 di mei alrededor di 3’or di atardi sentral di polis a risibí notifikashon di un aksidente pegá ku Te Amo Beach. Shofùr di un skuter a pèrdè kontrol di su bolante despues ku e vehíkulo su dilanti a para direpente. Shofùr di e skuter a risibí leshon i personal di ambulans a trata esaki na e sitio mes.