Number di emergensia: 911 Liña di tep di Polis: 9310

Notisia di polis di djabièrnè 27 di mei te ku djaluna 30 di mei 2022

Adaptá pa último biaha riba:

Kralendijk - Vários aksidente di tráfiko wikènt tras di lomba - Durante di e wikènt tras di lomba vários aksidente di tráfiko ku herido a tuma lugá.

Riba djadumingu 29 di mei, alrededor di 4.15 or di mardugá un aksidente a tuma lugá riba Kaminda Sabana Piedra Krus. Pa motibu deskonosí shofùr di e outo a pèrdè kontrol i kore drenta mondi. Ambulans a transporte pa hospital pa tratamentu médiko. Pa mas o ménos 6.20 or di mainta riba e mesun dia sentral di polis a risibí notifikashon di un aksidente ku a tuma lugá riba Kaya Korona. Aki ambulans a transportá dos okupante di e outo pa hospital pa tratamentu médiko. Algu mas lat, alrededor di 6.35 or di mainta, un kaso di hit & run a  tuma lugá riba Kaya Korona. Un outo ku tabata biniendo for di direkshon di Playa, bayendo den direkshon nort a kore dal den un outo ku tabata stashoná i a sigui kore.

KPCN ta hasi un apelashon na un i tur pa ta atento den tráfiko, tene bo mes na e velosidat permití, no hasi uzo di bo telefòn miéntras bo ta stür, bisti bo faha di seguridat i bebe na midi. Asina nos tur ta kontribuí na un tráfiko seif i sigur.

Entrada hudisial
Den oranan di mainta riba djadumingu 29 di mei, a tene un entrada hudisial den un kas na Antriol en konekshon ku un menasa ku arma ku a tuma lugá den e mardugá di 29 di mei. Durante di e entrada hudisial a konfiská un kantidat di droga i a detené un hòmber en konekshon ku violashon di Lei di Opio BES. Investigashon den e kaso ta kontinuá.

Kurpa sin bida
Riba djabièrnè 27 di mei, alrededor di algu pasa di 3 di atardi sentral di polis a risibí notifikashon ku mester a topa ku un kurpa sin bida den un kas situá na Rincon. Patruya, personal di e departamentu forensíko di KPCN i dòkter a akudí na e sitio. Despues di un investigashon kòrtiku, dòkter a konstatá morto ofisial di un hòmber di inisial A.E., nasé riba promé di novèmber 1969. Forsa na famianan.

Bo a mira algu sospechoso? Yama 717 8000 òf e liña di tep anónimo 9310.