Notisia di polis di djárason 11 di mei te ku djabièrnè 13 di mei 2022
Kralendijk - Den oranan di mardugá riba djabièrnè 13 di mei, alrededor di 2.30 or, a detené un hòmber di inisial C.E.J.A. na un kas situá na Kaya Jean B.F. Vitte pa maltrato, ladronisia, destrukshon i violashon di Lei di Opio BES. Mas trempan riba e mesun anochi a detené e sospechoso kaba pa violashon di Lei di Opio BES den Kaya Grandi. Algun ratu despues di esaki el a maltratá un dama. Na e kas a topa ku un mata di mariwana kual a konfiská huntu vários artíkulo mas.
Aksidente riba Kaminda Tra’i Montaña
Riba djárason 11 di mei un aksidente entre dos outo a tuma lugá riba Kaminda Tra’i Montaña. Komo ku un di e víktimanan a keda pega den e outo, brantwer tambe a akudí na e sitio i a kuminsá mesora ku trabounan pa saka e víktima for di e outo. E víktima su situashon tabata stabil. Komo ku mester a sera e kaminda na e sitio mester a desviá tráfiko ku tabata bini di Rincon bayendo den direkshon di Playa.
Disfrutá, pero bebe na midi
Atrobe ta kasi wikènt. KPCN ke avisá pa konsumí alkohòl ku límite si bo ta partisipá den tráfiko. Asina bo ta prevení situashonnan fèrfelu pa bo mes i pa otronan. Ta prohibí pa partisipá den tráfiko si bo a konsumí mas ku e kantidat máksimo permití. Si bo mester bai warda i ta haña un but ta dependé di e resultado di e tèst di supla.
Tèst di supla|
Ku un tèst di suplá polis ta kontrolá si bo ta bou di influensia di alkohòl. Bo ta obligá di partisipá na e tèst di supla. E tèst aki ta mustra si bo a bebe mas ku ta permití pa lei. Resultado di e tèst aki ta determiná si bo mester bai warda investigashon mas aleu. Bo ta nenga di hasi e tèst? E ora ei bo ta haña un prosèsferbal. Dependiendo di e resultado di e tèst di supla bo mester bai warda di polis pa un análisis di rosea. Durante e investigashon aki polis ta midi presis kuantu alkohòl bo a konsumí ku un aparato spesial.
Bo ta manehá bou d influensia di alkohòl? E ora ei bo ta haña un but, un prohibishon (temporal) pa manehá, un kastigu di prisòn òf un kombinashon di e kastigunan aki. E peso di e kastigu ta dependé di e seriedat di e situashon. Bo ta involukrá den un aksidente? E ora ei ta tèst bo mas lihé pa konsumo di alkohòl ku durante di un kontrol rutinario.
Mi ta kastigabel si mi ta fuma komo peaton?
Esaki ta posibel. Polis por duna un prosèsferbal pa buracheria públiko. Polis a topa bo den estado burachi? E ora ei polis ta uza bo aparensia di buracheria i bo aktitut. E ora ei no ta hasi un tèst di supla.
KPCN ta deseá un i tur un wikènt seif i plasentero!
Bo a mira algu sospechoso? Yama 717 8000 òf e liña di tep anónimo 717 7251.
