Notisia di polis di djaluna 17 di òktober te ku djárason 19 di òktober 2022
Kralendijk - Outo ta bòltu - Alrededor di 8.15 or di anochi riba djamars 17 di òktober, sentral di polis a risibí notifikashon tokante un aksidente ku a tuma lugá na altura di Jato Bako. Shofùr di un outo ku un patruya kier a para pa kòntròl, no a duna oido na esaki, a purba kore bai laga e patruya i bai bòltu. Ambulans a transportá shofùr i pasahero di e outo pa hospital pa tratamentu médiko. Ta investigando e kaso.
Buracheria ta kondusí na detenshon
Den oranan di mardugá di djárason 19 di òktober a detené un hòmber di inisial H.R.H.C. di 39 aña na Kaya Sonmontuno en konekshon ku manehá bou di influensia. A para e sospechoso despues ku a mir’e ta kore zeilu riba kaminda. E sospechoso no kier a kolaborá pa hasi e tèst di rosea. A bai kuné warda di polis kaminda a hasi un análisis di rosea. En konekshon ku resultado di esaki e sospechoso a haña prohibishon di 11 ora pa manehá i a kita su reibeweis.
‘Biketeam’ di KPCN aktivo
Riba djamars 18 di òktober e ‘biketeam’ di KPCN a patruyá den Centrumgebied i tambe na diferente bich en konekshon ku e barku krusero ku tabata den haf. Durante di esaki a atendé ku algun turista tokante nan komportashon di manehá. Durante evenementu den sentro di Kralendijk e ‘biketeam’ ta aktivo ku mantenshon di órden. Durante di Regata tras di lomba tambe nan tabata visibel.
Un di e benefisio nan mas grandi di e ‘biketeam’ ta ku nan ta hopi mobil; nan por lora rápido i nan por move fásil den un multitut, hanchi i kaya smal. P’esei e ‘biketeam’ ta ideal pa patruyá durante e temporada di krusero òf kualke otro aktividat ku tin hopi hende riba kaya. Si algu sosodé nan por move lihé pa áreanan ku ta será òf ku ta difísil pa yega (lihé) ku outo.
Mas aleu nan ta bon visibel i aksesibel. Asina polis ta pará mas serka di públiko.
Molèster di skuter mal stashoná
Den e periodo tras di lomba tabatin vários skuter dianan largu mal di parker den besindario di un lokalidat nokturno, na un sitio kaminda no mag parker. Esaki a a sòru pa molèster i a asta kousa situashon peligroso pa otro partisipantenan den tráfiko.
KPCN ke atvertí un i tur ku ta hasi su mes kulpabel na esaki , ku lo bai ku skuter mal stashoná warda di polis. E doño ta haña un prosèsferbal. Ku e prueba di pago di esaki e por buska e skuter bèk na warda di polis.
Bo a mira algu sospechoso? Yama 717 8000 òf e liña di tep anónimo 9310.
