Notisia di polis di djabièrnè 30 di sèptèmber te ku djaluna 3 di òktober 2022
Kralendijk - Ladronisia den negoshi situá na Kaya Korona - Den oranan di mardugá riba djaluna 3 di òktober un kaso di ladronisia a tuma lugá den un kompania situá riba Kaya Korona. E ladronnan a kousa daño konsiderabel na e edifisio i a bai ku un montante di sèn kèsh. E kaso ta bou di investigashon.
A evakuá habitantenan en konekshon ku un kònteiner na kandela
Riba djasabra 1 di òktober alrededor di 2.15 or di atardi sentral di polis a risibí notifikashon tokante un kònteiner di 20 pia ku tabata na kandela riba Kaya Anna. Komo ku e kandela a kousá hopi huma i e kònteiner tabata kontené opheto ku lo por kousa un eksploshon, a evakuá abitantenan na banda wèst di e kandela komo medida di seguridat. E kaso ta bou di investigashon.
Vehíkulo na kandela i un detenshon pa maltrato
Riba djasabra 1 òktober alrededor di 5.40 di mainta sentral di polis a risibí notifikashon tokante un vehíkulo na kandela den Centrumgebied. Brantwer a logra paga e kandela. Na e sitio tabata tin un grupo di hende den diskushon. Polis a purba kalma e situashon pero un di e personanan enbolbí a eskala e konflikto dor di dal un otro persona den kara. A detené un hòmber di inisial H.A.C. di 33 aña di edat en konekshon ku maltrato.
Detenshon pa maltrato ku arma
Den oranan di mardugá riba djabièrnè 30 di sèptèmber sentral di polis a risibí notifikashon tokante un maltrato ku arma na Hanchi Amboina. E víktima a deklará ku e sospechoso a maltrat’é ku un kuchú despues ku e víktima a ninga pa duna e sospechoso un left. Ambulans a transportá e víktima pa hospital pa tratamentu médiko. A detené un hòmber di inisial B.A.G.A. di 27 aña di edat en konekshon ku maltrato ku un arma algun ratu despues riba Kaya Papa Cornes.
Detenshon pa violashon di Lei di Opio BES
Den oranan di mardugá riba djasabra promé di òktober durante patruya, agentenan a nota un interkambio sospechoso den un grupo di hende. Na momentu ku agentenan a aserka e grupo di hende pa investigá e situashon, nan a nota ku un di e sospechosonan a pone un opheto deskonosí bou di saya di un otro sospechoso, kual na su turno a benta e opheto den outo. Na momentu ku polis a bai investigá e opheto, a resultá ku esaki tabata kontené droga. A detené tur dos sospechoso; un muhé di ku inisial L.E.d.E. di 20 aña di edat i un hòmber di inisial E.S.T.T. di 29 aña di edat, en konekshon ku violashon di Lei di Opio BES.
Akshon di limpiesa di ‘beslag ruimte’(área ku ta kontené artíkulonan konfiská) di KPCN: por buska artíkulonan te ku 30 di òktober
Riba djabièrnè 4 di novèmber 2022 KPCN lo organisá un akshon di limpiesa di e área ku ta kontené artíkulonan konfiská (beslag ruimte) di warda di polis Playa. Ta trata di artíkulo òf vehíkulo pa kual tin un poder hudisial pa destruí i ku mester retirá for di tráfiko di forma adekuá.
Komo ku e orígen di sierto artíkulo i vehíkulo ta deskonosí, KPCN ta hasi un petishon na tur doño di artíkulo i vehíkulo konfiská pa mèldu via mail politie@politiecn.com, via telefòn na (+599) 715 8000 òf na warda di polis na Kaya Libertador Simon Bolivar 4. Komo doño mester mèldu ku un prueba di propiedat i mester kumpli ku e lei- i reglanan pa loke ta trata uso di e artíkulo òf vehíkulo. Por pensa riba por ehèmpel un reibeweis bálido i un prueba di seguro. Artíkulo i vehíkulo konfiská di kual e doñonan ta konosí pa KPCN, lo risibí un notifikashon pa esaki den e temporada benidero.
Lo destruí tur artíkulo i vehíkulo ku no a rekohé promé ku djadumingu, 30 di òktober 2022, den e akshon di limpiesa riba djabièrnè, 4 di novèmber 2022.
Bo a mira algu sospechoso? Yama 717 8000 òf e liña di tep anónimo 9310.
