Notisia di polis di djabièrnè 9 di sèptèmber te ku djaluna 12 di sèptèmber 2022
Kralendijk - Detenshon pa buracheria públiko Riba djaluna 12 di sèptèmber alrededor di 2.20 or, a detené un hòmber di inisial P.R.P.O. di 59 aña di edat en konekshon ku buracheria públiko. E sospechoso tabata pará kantu di kaminda ta oriná den pleno bista. Ademas a konstatá ku e hòmber tabata bou di influensia di alkohòl. A detené e hòmber i a hib’e warda di polis.
Skuter ta slep dor di tera riba kaminda
Alrededor di 1.30 or di mardugá riba djadumingu 11 di sèptèmber un aksidente ku un skuter a tuma lugá na krusada di Kaya Korona i Kaya Nikiboko Nòrt. Shofùr di e skuter a slep dor di tera lòs riba kaminda. A transportá shofùr ku ambulans pa hospital pa tratamentu médiko. E shofùr tabatin hèlm bistí.
Detenshon pa violashon di Lei di Arma
Den oranan di mardugá, alrededor di 4 or riba djasabra 10 di sèptèmber, a detené un hòmber di inisial B.A., di 27 aña di edat riba Kaya Maria Carmen Hellmund-Boom en konekshon ku violashon di e Lei di Arma BES. E sospechoso tabata enbolbí den un bringamentu i a bai kas pa buska arma (dos kuchú).
Detenshon pa maltrato ku arma
Den oranan di anochi riba djabièrnè 9 di sèptèmber, a detené dos hòmber di inisial J.E.A. di 21 aña di edat i J.P.G.J.G. di 46 aña en konekshon ku maltrato ku un arma. E sospechosonan a maltratá un hòmber ku un bate di beisbòl. A transportá e víktima pa hospital pa tratamentu médiko.
Kas ta kima kompletamente
Alrededor di algu pasa di 6 or riba djabièrnè 9 di sèptèmber, polis a risibí notifikashon tokante un kas na kandela den área di Seru Grandi. Brantwer a logra paga e kandela pero e kas a kima por kompletu. No tabatin herido. E kousa di e kandela ta bou di investigashon.
Trùk di betòn a kore drenta kura kas
Riba djabièrnè 9 di sèptèmber alrededor di 6:45 or di atardi un aksidente a tuma lugá. Un trùk ku ta transportá betòn tabata kore riba Kaya Nikiboko Sùit i diripiente a kore baha kaminda, basha un muraya di un kura abou i a bin stòp serka di entrada di e kas. No tabatin herido pero sí basta daño material.
Bo a mira algu sospechoso? Yama 717 8000 òf e liña di tep anónimo 9310.