Kon nos ta atendé bo keho?

Entregá un keho kontra polis

Bo no ta kontentu ku komportashon di un agente polisial. Bo a entregá un keho tokante esei òf bo tin intenshon pa hasi esei. Polis mester hasi su trabou ku koutela i korektamente. P’esei semper ta atendé keho kontra polis ku koutela.

Dikon entregá un keho na polis?

Den Lei General Derecho Atministrativo tin pará ku mester entregá keho serka e instansia kaminda esaki a originá, den e kaso akí serka polis. Asina bo ta haña oportunidat pa drenta den kòmbersashon ku e agente polisial konserní i esaki por splika dikon ela aktua di sierto forma. Den hopi kaso e kòmbersashon ei ta kondusí na un resultado positivo pa ámbos partido.

Kiko bo por spera?

1. Ta aseptá

Ora nos risibí un keho, nos ta manda un konfirmashon di resepshon dentro di 3 dia di trabou. Esun ku ta tuma e keho den tratamentu, ta un kolaboradó di polis ku tin e funshon di kordinadó di keho. E kordinadó di keho akí ta deliberá ku bo, kiko bo kier logra ku bo keho i kiko bo keho ta enserá eksáktamente. E kordinadó di keho ta asumí un posishon neutral i ta tene bo interes i di e agente polisial kontra kende bo a entregá un keho, na bista.

Den e kòmbersashon akí, e koordinadó di keho ta duna di konosé tambe si por tuma bo keho den tratamentu segun e areglo di keho. T’asina ku e areglo di keho den sierto kaso no ta aplikabel. Den e kaso ei, e kordinadó di keho ta splika kua ta e siguiente pasonan ku bo por tuma.

Ta posibel ku bo ta satisfecho despues di e promé kontakto ku e kordinadó di keho i bo ta deseá pa no sigui trata bo keho. Den e kaso ei, e prosedura ta para. Bo ta risibí un konfirmashon di esaki i ta sera e dosié.

2. Tratamentu di keho informal den e promé fase

Ora bo disidí pa laga trata bo keho, bo tin e posibilidat pa drenta den kòmbersashon ku e agente(nan) polisial konserní. E kordinadó di keho ta evaluá si un kòmbersashon asina por yuda pa solushoná e keho. E kordinadó di keho lo puntra bo si bo ta deseá un kòmbersashon di mediashon asina. Si esei ta e kaso, e lo traha un sita pa esaki. E kordinadó di keho lo ta presente durante e kòmbersashon ei.

E kòmbersashon akí por tin tres resultado:

• Bo ta satisfecho i ta di opinion ku a trata bo keho sufisientemente. Bo ta risibí un konfirmashon por eskrito di esaki i ta sera e dosié.
• Bo no ta satisfecho, pero ta di opinion ku no ta nesesario pa sigui ku su tratamentu. Den e kaso ei tambe bo ta risibí un karta ku ta konfirmá esaki i ta sera e dosié.
• Bo no ta satisfecho i ta deseá un desishon di e hefe di kuerpo. Den e kaso ei ta sigui ku tratamentu di bo keho den e di dos fase.

3. Tratamentu keho formal den e di dos fase

Si bo no ta satisfecho ku resultado di e tratamentu informal di bo keho, por presentá esaki e ora ei na e hefe di kuerpo. E ta e persona finalmente responsabel na Boneiru, Sint Eustatius i Saba. E hefe di kuerpo ta laga un komishon di keho eksterno konseh’é. E miembronan di e komishon aki no tin laso ku e organisashon polisial. 

E komishon di keho tin su propio método. E ta investigá e keho i ta organisá eventualmente un oudiensia den kua bo por indiká kon bo a eksperensiá e akshon polisial. E agente polisial por reakshoná riba esei. A base di e investigashon i resultado di e oudiensia, e komishon di keho ta traha un konseho pa e hefe di kuerpo.

4. Evaluashon di bo keho

E hefe di kuerpo ta forma un bista pa su mes di e diferente partinan di e keho i ta tuma un desishon al respekto. Esaki ta sosodé basá riba e konseho ku el a risibí di e komishon di keho.

E evaluashon di e keho por ta:

• Fundá: bo keho ta na su lugá;
• Infundá: bo keho no ta hustifiká;
• No tin opinion: un desishon no ta posibel;
• No ta atmisibel: bo keho no ta kumpli ku e eksigensianan.

Bo ta risibí un karta den kua ta splika bo kiko e evaluashon ta enserá i kon a yega na esaki. Ta informá e agente polisial konserní i su hefe tambe tokante e resultado.

Kon largu e ta dura?

Ta finalisá e fase informal di tratamentu di e keho denter di 10 siman despues ku a risibí bo keho. Si bo pidi pa laga e komishon di keho duna un konseho, e ora ei ta prolongá e periódo akí ku por lo ménos 4 siman. Por prolongá e periódo total di tratamentu un biaha mas ku 4 siman te máksimo 18 siman.

Bo ta di akuerdo ku e resultado?

Si bo no ta di akuerdo ku e desishon di e hefe di kuerpo, bo por presentá bo keho na Nationale ombudsman. Pa esaki bishitá e wèpsait www.nationaleombudsman.nl/caribisch-nederland.

Uzo di datonan personal

Polis ta legalmente obligá pa atendé kehonan debidamente. Pa esei mester kolektá i prosesá dato. Den lei tin pará kua dato personal ta nesesario pa esei.

Durante investigashon di e keho ta posibel ku ta kolektá informashon for di internèt, medionan sosial, kolaboradónan polisial i eventual otro fuente. Despues ku sera e dosié di keho, ta warda e datonan aki sinku aña. Nos ta anda kouteloso ku e datonan ei, respetando privasidat di kada hende.