Notisia di polis di djaluna 4 di aprel te ku djárason 6 di aprel 2022
Kralendijk - Detenshon - Riba djamars 5 di aprel a detené un hòmber di inisial K.F.M.E. di 49 aña di edat na Kaya Grandi en konekshon ku insulto di un ámtenar den funshon i pa destrukshon. Pa motibu di un notifikashon tokante bendementu di droga na un kas situá na Kaya Grandi, a listra e sospechoso durante kua, dor di rabia, el a tira piedra riba un outo ku tabata stashoná. A detené na e sitio. Den e kas a topa ku sèn kèsh ku a konfiská.
Detenshon pa menasa
Riba djamars 5 di aprel a detené un hòmber di inisial R.V.M.L. di 32 aña en konekshon ku menasa. Na promé instante a para e sospechoso pa un kòntròl komo ku e tabata manehando un outo sin plachi di number. Riba e pregunta pa mustra su dokumentunan, e por a mustra un reibeweis pero no tabatin un prueba di seguro bálido huntu kuné. E sospechoso a menshoná ku e mester hasi un yamada pa esaki. A dun’e òrdu pa no uza su telefòn komo ku na un pòmp di gasolin uzo di telefòn selular ta prohibí. A surgi un diskushon entre e sospechoso i un agente polisial kaminda e sospechoso a kuminsá menasa e agente polisial i a detené sospechoso.
Entrada hudisial
Den oranan di atardi riba djaluna 4 di aprel a tene entrada hudisial na un kas situá den a bario di Sofaya na Rincon i na un kunuku, tambe na Rincon. A tene e entradanan hudisial en konekshon ku kasonan andando di kiebro den akomodashonnan turístiko i ladronisia na sitionan turístiko. Durante di e entradanan a konfiská vários artíkulo. En konekshon ku e kaso aki a detené dos hòmber te ku awor. Mas lat a laga un di e hòmbernan aki den libertat. Investigashon den e kaso ta den full suin i no ta ekskluí ku lo bai tin mas detenshon.
Rektifikashon: Outo ta dal den muraya
E aksidente ku a tuma lugá riba djárason 23 di mart riba Bulevar E.E.G. kaminda un outo a dal den un muraya, tabatin un otro kousa ku loke a menshoná anteriormente. Un opheto a kai riba flur di e outo i a bai pega bou di e pedal di brek loke a hasi wantamentu di brek imposibel. Personal di ambulans a chek e shofùr na e sitio mes i e no mester a bai hospital.
Bo a mira algu sospechoso? Yama 717 8000 òf e liña di tep anónimo 717 7251.
