Notisia di polis di djabièrnè 29 di yüli te ku djaluna promé di ougùstùs 2022
Kralendijk - Aksidente rotònde Soeurnan di Rozendal - Den oranan di mainta riba djaluna promé di ougùstùs un aksidente entre un outo i un baiskel a tuma lugá na e rotònde di Soeurnan di Rozendal. Ambulans a akudí na e sitio pero no mester a transportá ningun persona pa hospital.
Detenshon en konekshon ku insulto i resistensia
Alrededor di 1.15 or di mardugá riba djaluna promé di ougùstùs a hasi un detenshon na un establesimentu nokturno situá na Hanchi Amboina. Despues di un kaso di bringamentu un muhé ku tabata na e sitio a ekspresá su mes ku insulto kontra e agentenan polisial presente. Tambe el a duna resistensia na momentu ku tabata atendé kuné pa detené. A detené e muhé di inisial C.Y.O.S. di 28 aña di edat en konekshon ku insulto i resistensia.
Detenshon pa manehá bou di influensia
Den oranan di mardugá riba djaluna promé di ougùstùs, alrededor di 12.40 or, a detené un hòmber di inisial J.L.C.J. di 42 aña di edat riba Kaya Nikiboko Nort en konekshon ku manehá bou di influensia di alkohòl. Un patruya a mira e outo kore ta wela riba e kaya menshoná. A para e shofùr despues di kua a konstatá ku e tabata bou d influensia di alkohòl. A detené pa esaki. Mas despues a resultá ku e sospechoso no tin reibeweis bálido tampoko. Un di e dos damanan ku tabata den outo huntu ku e sospechoso no por a mustra dokumentunan bálido i a pas’e over pa e servisio di estranhero.
Aksidente ku quad na Kaya Korona
Riba djadumingu 31 di yüli, alrededor di 4.35 or di atardi, un aksidente a tuma lugá riba Kaya Korona. Pasahero di un quad a kita kai for di e quad na momentu ku diripiente e shofùr duna tròt. Ambulans a transportá e pasahero pa hospital pa tratamentu médiko. Shofùr di e quad a drenta pániko i a sigui kore pero djis despues a regresá na e sitio di e aksidente.
Detenshon
Den oranan trempan di mainta riba djadumingu 31 di yüli, alrededor di 5.15 or, a detené un hòmber di inisial J.I.R. di 22 aña di edat en konekshon ku insulto. E sospechoso tabata hasi bochincha i mustra komportashon agresivo na un notifikashon na Kaya Mamore kaminda a pidi asistensia di polis. Despues di a atvertié algun biaha, a detené en konekshon ku insulto, pa no duna oido na òrdu di polis i pa resistensia.
A sera Kaya J.N.E. Craane temporalmente
Riba djasabra 30 di yüli a sera Kaya J.N.E.Craane temporalmente for di haltura Parke Tului te ku na haltura di Kaya Aruba. Esaki pa de-eskala e formashon di fila ku a surgi dor di un aktividat sin pèrmit ku tabatin riba awa. Aki a parti algun but tambe pa entre otro manehá sin faha di seguridat, sin plachi di number bálido i tambe sin reibeweis bálido.
Bureau Slachtofferhulp ta muda temporalmente
Entrante awe, promé di ougùstùs 2022, Bureau Slachtofferhulp ta muda for di e edifisio situá na Amboina. E Bureau lo establesé su mes temporalmente den Destiny Building situá na Kaya Soeur Bartola 9. Bureau Slachtofferhulp lo keda aksesibel via telefòn riba number 717 – 6181, di djaluna pa djabièrnè, di 7.30 or di mainta pa 12 or di mèrdia i di 1.30 or pa 5 or di atardi. Semper por manda meil na slachtofferhulp@politiecn.com.
Bo a mira algu sospechoso? Yama 717 8000 òf e liña di tep anónimo 9310
