Notisia di polis di luna di desèmber: di djaweps 1 di desèmber te ku djaweps 29 di desèmber

Detenshon pa violashon di Lei di Opio BES
Riba djamars 27 de desèmber alrededor di 10.10 di anochi un detenshon a tuma luga riba Kaya Papa Cornes. Durante un kòntròl general polis a detené un sospechoso ku tabata den poseshon di supstansianan presumiblemente narkótiko. Ta trata di un hòmber di 44 aña di edat di inisial J.J.G.R. ku a detené pa motibu di violashon di Lei di Opio BES.

Detenshon pa manehá bou di influensia
Riba djamars 27 di desèmber alrededor di 08.42 di anochi un detenshon a tuma lugá riba Hanchi Amboina. Despues di un aksidente entre dos vehíkulo, polis a realisá un kòntròl for di kual a resultá ku e shofùr tabata bou di influensia di alkohòl. A detené un hòmber di 49 aña di edat ku inisial R.J.Z.V.

Kiebro den kas
Riba djaluna 26 di desèmber alrededor di 11.42 di anochi Kuerpo Polisia Hulanda Karibense a risibí keho di kiebro den un kas situá na Kaya Grandi. Deskonosínan a kibra drenta den e kas i bai ku un iPad, spiker di Bluetooth i diferente prenda. Ta investigando e kaso.

Kiebro den akomodashon turístiko na Punt Vierkant
Riba djaluna 26 desèmber alrededor 6.40 or di atardi Kuerpo Polisial Hulanda Karibense a risibí keho di kiebro den un akomodashon turístiko na Punt Vierkant. Deskonosínan a kibra drenta den e akomodashon i bai ku un televishon i paña di kama. Ta investigando e kaso.

Detenshon pa manehá bou di influensia
Riba djadumingu alrededor di 11.30 di anochi un aksidente a tuma lugá riba Kaya Nikiboko Zuid. Shofùr di un outo a kore dal den un kura. E investigashon a indiká ku e shofùr tabata bou di influensia di alkohòl. A detené un hòmber di 60 aña di edat di inisial A.D.M.C.

Hit & run ku resultado mortal
Riba djadumingu 25 di desèmber alrededor di 6 or di mainta un hit & run a tuma lugá riba Kaya Korona. Un outo a alkansá un siklista i a sigui kore. E siklista, un hòmber di 41 aña di edat di inisial P.J.V.B. nase na Hulanda, a fayesé na e sitio. Polis a kuminsá un investigashon inmediatamente i a yama e sospechoso pa bin mèldu su mes na warda di polis pa medio di un komunikado di prensa. A detené un hòmber di 32 aña di edat di inisial E.M.T. pa motibu di asesinato, morto pa kulpabilidat, laga un persona atras ku heridanan grave i sigui kore despues di un aksidente. Ta investigando e kaso.

E investigashon a demostrá ku durante di e aksidente tabata tin un pasahero den e outo huntu ku e sospechoso. Ministerio Públiko i Kuerpo Polisial Hulanda Karibense ta pidi e pasahero aki ku urgensia pa mèldu su mes na warda di polis di Boneiru, Kaya Libertador Simon Bolivar #4 pa por skuch’é komo testigu. Update: E kaso ta sigui bou di investigashon i  hues komisario a duna òrdu pa e sospechoso keda bou di disponibilidat di hustisia pa mas largu miéntras ku ta investigá e kaso.

Detenshon pa manehá bou di influensia
Riba djasabra 24 di desèmber alrededor di 4.30 di anochi un aksidente a tuma lugá entre un pikòp i un outo di famia na Hanchi Amboina. Shofùr di e pikòp a pèrdè kontrol di su vehíkulo i a bin dal den e outo di famia. Ambulans a transportá e tres personanan den e outo di famia pa hospital pa tratamentu médiko. A detené e shofùr di e pikòp, un hòmber di 39 aña di edat ku inisial A.E.T.T. pa manehá bou di influensia.

Detenshon pa ladronisia
Riba djasabra 24 di desèmber alrededor di 1.30 or di atardi sentral di polis a risibí notifikashon di kiebro den un akomodashon turístiko riba Bulevar E.E.G. E sospechoso a bai ku diferente hoyanan. A detené un muhé di 26 aña di edat di inisial D.A.D.S.J. en konekshon ku e kaso aki. E kaso ta bou di investigashon.

Detenshon pa manehá bou di influensia
Riba djasabra 24 di desèmber alrededor di 2.15 or di mardugá un patruya di polis a nota un persona ku tabata manehá di manera sospechoso riba un skuter riba Bulevar E.E.G. durante vigilansia general. Despues di un kòntròl, e shofùr a resultá ta bou di influensia di alkohòl. A detené un hòmber di 23 aña di edat di inisial D.A.K.J. 

Detenshon pa manehá bou di influensia
Riba djabièrnè 23 di desèmber alrededor di 9.30 or di anochi un patruya di polis tabata manehá riba Kaminda Jato Bako den direkshon pa atendé ku un notifikashon ku a drenta sentral di polis, na momentu ku un outo a keda sin duna preferensia i a kausa un aksidente. E outo di polis a bin dal den e outo. Un kòntròl pa invesitigá e motibu di e violashon di regla di tráfiko a konstatá ku e shofùr tabata bou di influensia di alkohòl. A detené un hòmber di 53 aña di edat di insial R.J.G.C.

Ladronisia di un vehikulo
Riba djabièrnè 23 desèmber alrededor di 12.20 or di mardugá polis a risibí keho di ladronisia di un vehíkulo. Ta trata di un Chevrolet TrailBlazer di plata di aña 2007, hòrta riba Bulevar Santa Barbara Abou. Kuerpo Polisial Hulanda Karibense ta pidi un i tur ku tin algun informashon pa tuma kontakto via e-mail: politie@politiecn.com, telefónikamente via e liña general: +599 715 8000 òf via e liña di tep (anónimo):  9310, òf bini warda di polis na Boneiru riba kaya Libertador Simon Bolivar #4.

Detenshon pa manehá bou di influensia
Den oranan di mardugá riba djaweps 22 di desèmber un detenshon a tuma lugá riba Kaya Caribe pa manehá bou di influensia i no kumpli ku instrukshon di polis. Agentenan polisial a para e shofùr di un vehíkulo pa motibu ku esaki tabata manehá di manera sospechoso. Durante e kòntròl, agentenan a pidi pa mira e dokumentashon nesesario i e shofùr a ninga i bira verbalmente agresivo kontra polis. Despues di e echo, e shofùr a resistí kontra su aresto i agentenan a haña nan mes obligá pa detené e sospechoso hasiendo uso di forsa físiko. Kontrol adishonal a konstatá ku e shofùr tabata manehá bou di influensia di alkohòl. A detené un hòmber di 41 aña di edat di inisial O.T.M.

Detenshon pa manehá bou di influensia despues di un Hit & Run
Riba djaluna 19 di desèmber alrededor di 12.15 or di mardugá un hit & run a tuma lugá riba Kaya Nikiboko Zuid. Dos vehíkulo a dal den otro i un di e shofùrnan a sigui kore. Shofùr di e otro vehíkulo a disidí di persiguí e vehíkulo ku a hui i a informá polis di e situashon ora tur dos outo a stòp di kore. A detené e shofùr di e outo ku a hui, un hòmber di 36 aña di edat di inisial A.A.H.S., pa motibu di kore bou di influensia di alkohòl. Kuerpo Polisial Hulanda Karibense ta konsehá públiko pa nan mesun seguridat pa no realisá un persekushon den situashonnan manera esaki. Bo por trese bo mes i otronan den peliger. Purba nota un deskripshon di e shofùr, i si ta posibel nota e plachi di number, bèl polis i keda warda pa asistensia na e sitio.

Boto sospechoso ku droga interseptá (REPiTISHON KOMUNIKADO DI WARDAKOSTA)
Ayera, 17 di desèmber, den oranan di atardi Wardakosta a detektá un boto sospechoso bayendo den direkshon di Kòrsou. Sentro di Operashon Maritimo (MOC) a lansa avion Dash inmediatamente pa lokalisá e boto i a manda e boto di patruya Metal Shark-01 pa hasi e intersepshon. Miéntras ku e boto sospechoso a kambia direkshon i a kuminsá bai e kosta sùit di Boneiru.

E tim Multidisiplinario Maritimo Hub Boneiru (MMHB), un kolaborashon entre KPCN, KMAR, OLB, KWCarib i Douane pa mantené e fronteranan marítimo di Boneiru seif pa medio di un planifikashon konhunto, a manda e boto di patruya di Douane, ku un patruya di Wardakosta abordo, pa yuda ku e intersepshon. A hasi uso di esaki pa promé biaha i a resultá eksitoso despues di e promé biaha. Despues di un persekushon den awanan teritorial di Boneiru, Wardakosta a disidí di tira riba e motor di e boto pa paga esaki. Duoane i Wardakosta a determiná ku e boto tabata kontené supstansianan probablemente narkótiko. E MS-01 a trese e boto sospechoso na e kosta di Boneiru.

Na momentu ku e boto a yega kosta di Boneiru, Kuerpo Polisial Hulanda Karibense (KPCN) a kuminsá un investigashon lokual a konfirmá ku enberdat ta trata di supstansia narkótiko. A konfiská un kantidat di 1280 kg di kokaina i a destruí esaki inmediatamente. A detené kuater persona en konekshon ku e kaso aki. Un hòmber di 29 aña di edat ku inisial R.G., un hòmber di 52 aña di edat ku inisial R.A.G., un hòmber 39 aña di edat ku inisial J.R. i un hòmber di 45 aña di edat ku inisial A.V. E kaso ta bou di investigashon.

Detenshon pa menasa i destrukshon
Riba djasabra 17 di desèmber alrededor 10.25 or di mainta un detenshon a tuma lugá riba Kaya J.G. Hernandez pa motibu di menasa i destrukshon. Promé ku e detenshon a tuma lugá, sentral di polis a risibí notifikashon di un sospechoso ku lo a menasá un persona, destruí su propiedat i despues bai. Polis a kuminsá búskeda inmediatamente i a enkontrá i detené e sospechoso, un hòmber di 37 aña di edat di inisial L.V.P.

Detenshon pa manehá bou di influensia
Riba djasabra 17 di desèmber alrededor di 4.15 or di atardi un detenshon a tuma lugá riba Kaya Libertador Simon Bolivar. Shofùr di un vehíkulo tabata manehá di manera sospechoso dilanti di warda di polis. Durante e kòntròl, e shofùr a resultá ta bou di influensia di alkohòl. A detené un hòmber di 20 aña di edat di inisial L.G.R.T.

Detenshon pa manehá bou di influensia
Riba djasabra 17 di desèmber alrededor di 2.30 or di mardugá un detenshon a tuma lugá riba Kaya International pa motibu di manehá bou di influensia di alkohòl. Durante un patruya general, agentenan a para un motersaikel ku dos persona di kual unu no tabata tin un hèlm bisti. Durante e kòntròl e shofùr di e motersaikel a resultá ta bou di influensia di alkohòl. A detené un muhé di 18 di edat di inisial C.M.C.V.E.

Aksidente ku resultado mortal
Riba djabièrnè 16 di desèmber alrededor di 7 or di mainta un aksidente a tuma lugá entre un outo i un siklista riba Kaya Carlos A. Nicolaas. Ambulans a transportá e siklista pa hospital pa tratamentu médiko. E siguiente dia, djasabra 17 di desèmber, e siklista, un hòmber di 66 aña di edat di inisial M.J.W. nase na Boneiru, a fayesé. E kaso ta bou di investigashon.  

Detenshon pa manehá bou di influensia
Riba djaweps 15 di desèmber alrededor di 10 or di anochi un aksidente a tuma lugá riba Kaya Hermandad. Shofùr di un outo a pèrdè kontrol di su outo i a terminá den un roi. Durante e kòntròl e shofùr a resultá ta bou di influensia di alkohòl. A detené un hòmber di 39 aña di edat di inisial E.R.B.R.

Detenshon pa manehá bou di influensia
Riba djaweps 15 di desèmber alrededor di 7.50 or di anochi un detenshon a tuma lugá na Hanchi Amboina durante un kòntròl di tráfiko. Durante e kòntròl aki, shofùr di un vehíkulo no tabatin reibeweis i dokumento di seguro bálido i a resultá ta bou di influensia di alkohòl. Mas investigashon a konstatá ku e shofùr no tabata por a mustra un pèrmit òf prueba di residensia bálido. A detené un hòmber di 42 aña di edat di inisial M.R.M.N. pa manehá bou di influensia di alkohòl i a dun’e un but pa e echo ku e no por a mustra e dokumentashon nesesario. E kaso ta bou di investigashon na e departamento di servisio pa ekstranhero di KPCN.

Aksidente riba Kaminda di Rincon
Riba djamars 13 di desèmber, alrededor di 7 or di anochi un aksidente a tuma lugá riba kaminda di Rincon. Un trùk ku tabata transportá mashin di asfalt tabata kore di Rincon bai Playa. Un outo ku tabata kore den direkshon kontrali a bin dal den e trùk i e outo a keda duars riba kaya. Un di tres vehíkulo a bini dal den e outo aki. Despues di e aksidente tabatin vários personanan ku a keda pega den e outo. Brantwer a logra saka e personanan for di den e outo i a transportá tur dos shofùr pa hòspital pa tratamentu médiko.

Sambuyadó a haña su mes den problema
Riba djaluna 12 di desèmber alrededor di 4.45 di atardi sentral di polis a risibí notifikashon di un sambuyadó ku a haña su mes den problema riba Bulevard Julio A. Abraham. Na momentu ku polis a yega, un siudadano tabata duna e sambuyadó promé ousilio i un agente a tuma e reanimashon over te na momentu ku personal di ambulans a yega na e sitio. Apesar di tur e intentonan di reanimashon, e víktima a fayese. Ta trata di un hòmber di 76 aña di edat di inisial H.V.D.P.

Detenshon pa menehá bou di influensia
Riba djaluna 12 di desèmber alrededor di 12.44 or di mardugá un detenshon a tuma lugá riba Kaya Grandi. Durante un patruya general agentenan polisal a stòp un outo pa motibu ku esaki tabata manehá sin lus. Durante e kòntròl a resultá ku e shofùr di e outo tabata bou di influensia di alkohòl. A detené un hòmber di 19 aña di edat di inisial J.C.V.D.M.

Detenshon pa violashon di Lei di Opio BES
Riba djadumingu 11 di desèmber alrededor di 12.35 or di mardugá un detenshon a tuma lugá riba Kaya International. Durante un patruya general, agentenan polisial a enkontrá un motorsiklista ku tabata manehá sin hèlm den via kontrali. E motorsiklista a ignorá señal di polis pa stòp i a sigui kore. Despues di un persekushon, polis a alkansá e motorsiklista i a hasi un kòntròl. Durante kual nan a enkontrá suptansianan presumiblemente narkótiko. A detene un homber di 20 aña di edat di inisial K.I.R. pa violashon di Lei di Opio BES i a dun’e un but pa e diferente violashonan di tráfiko ku ela komete.

Detenshon pa manehá bou di influensia
Riba djasabra 10 di desèmber alrededor di 4.30 or di atardi un aksidente a tuma lugá entre dos outo riba Kaya Korona. Na momentu ku polis a yega na e sitio nan a realisá un kòntòl ku a konstatá ku un die shofùrnan tabata manehá bou di influensia di alkohòl. A detené un homber di 34 aña di edat di inisial Y.I.V.N.

Detenshon pa manehá bou di influensia
Riba djaweps 8 di desèmber alrededor di 8.15 or di anochi un aksidente entre dos outo a tuma lugá na Hanchi Amboina. Kòntròl despues di e aksidente a konstatá ku un di e shofùrnan tabata manehá  bou di influensia di alkohòl. A detené un hòmber di 75 aña di edat di inisial I.O.W. pa manehá bou di influensia i a duna e shofùr un prohibishon di manehá pa 24 ora.

Detenshon pa ladronisia
Riba djamars 6 di desèmber alrededor di 1.30 or di atardi Kuerpo Polisial Hulanda Karibense a risibí keho di ladronisia di un telefòn. E investigashon di polis a dirigí na imágen di vidio di e momentu ku e ladronisia a tuma lugá. Pa medio di e imágen di vidio, polis por a identifiká e sospechoso. A detené un hòmber di 53 aña di edat di inisial J.C.N.A.

Bisiñanan preokupá ta yuda un persona den nesesidat
Riba djamars 6 di desèmber alrededor di 9.10 or di mainta sentral di polis a risibí notifikashon di bisiñanan preokupá pa nan bisiña ku nan no mira den basta tempu. Na momentu ku agentenan a yega na e sitio, nan a bati na porta pero nan no a risibí kontesta. Nan por a skucha zonido ku tabata indiká ku tabatin un persona probablemente den un situashon di emergensia. E agentenan a disidí di dal e porta abou i a enkontrá e víktima den estado krítiko. Ambulans a yega na e sitio i a duna e persona promé ousilio i transport’e pa hòsital pa tratamentu médiko.

Intento di atrako
Den oranan di mainta di djamars 6 di desèmber un intento di atrako a tuma lugá na un toko situa riba Kaya Avelino (Abechi) Cecilia. Un persona a drenta e negoshi ku su kara tapá i un machete i a purba saka sèn for di den e kaha. E intento a faya i e sospechoso a kore bai. E kaso ta bou di investigashon.

Detenshon pa maneha bou di influensia
Riba djaduming 4 di desèmber alrededor di 8.40 di anochi un aksidente a tuma lugá entre dos outo riba Kaya Korona. Dos vehíkulo a dal frontal den otro. Un di e shofùrnan a keda heridá durante e aksidente i agentenan stabilis’é miéntras personal di ambulans a yega. Un analisis di rosea a demostrá ku e shofùr heridá tabata bou di influensia di alkohòl na momentu di e aksidente. A detené un hòmber di 56 aña di edat di inisial D.K.G.K.

Vehíkulo ta resulta den roi
Riba djasabra 3 di desèmber, alrededor di 5.40 or di atardi un aksidente a tuma lugá riba Bulevar E.E.G.  Pa motibu deskonosí shofùr di un outo a pèrdè kòntròl riba su vehíkulo i bai resultá den un roi. Ambulans a transporte pa hospital pa tratamentu médiko.

Bo a mira algu sospechoso? Yama 717 8000 òf e liña di tep anónimo 9310