Number di emergensia: 911 Liña di tep di Polis: 717-7251

Notisia di polis di djabièrnè 11 di febrüari te ku djaluna 14 di febrüari 2022

Adaptá pa último biaha riba:

Kralendijk - Aksidente unilateral Riba djabièrnè 11 di febrüari 2022 alrededor di 4.45 di mardugá un aksidente unilateral a tuma lugá riba Boulevard Gob. Nicolaas Debrot. Shofùr di skuter a kai for di su skuter i a risibí herida na su kabes. A transportá e shofùr ku ambulans pa hòspital pa tratamentu médiko.

‘Hit and run’
Riba djabièrnè 11 di febrüari 2022 alrededor di 2.45 di mèrdia un ‘hit and run’ a tuma lugá riba Kaya Amsterdam. Shofùr di un skuter a keda alkansá na momentu ku e la bai purba hala pasa un baiskel i na mes momentu un outo a hala pas’é. Durante e maniobra ku no a bai bon, e outo a alkansá e shofùr di skuter, kual despues e skuter a alkansá e baiskel. E outo a sigui kore. Shofùr di e skuter a risibí rasku. Tambe tin daño material na e skuter i baiskel a konsekuensia di e ‘hit and run’ aki. E kaso ta bou di investigashon.

Kiebro den negoshi
Entre djabièrnè 11 di febrüari 2022 alrededor di7.10 di anochi i djasabra 12 di febrüari 2022 alrededor di 5.35 or di mainta, un kiebro den negoshi a tuma lugá den un negoshi situá na Kaya JC van de Ree. Deskonosínan a bai ku alkohòl i sigaria. Polis ta investigando e kaso.

Ladronisia for di vehíkulo na sitio di sambuyá Angel City
Riba djasabra 12 di febrüari 2022 entre 1’or i 2’or di mèrdia na sitio di sambuyá Angel City situá riba E. E. G. Bulevar, un ladronisia for di un vehíkulo a tuma lugá. Deskonosínan a bai ku un tas ku ekipo di sambuyá di reserva, un tas pretu ku kontenido i un tas pa tene kos friu ku un bòter di bebe kolo kòrá, for di den un outo stashoná. E outo for di kua a bai ku e tasnan ku kontenido aden tabata será pero no na yabi. E kaso ta bou di investigashon.

Maltrato ku bòter di serbes
Riba djasabra 12 di febrüari 2022 alrededor di 11.35 di anochi, sentral di polis a risibí notifikashon di un bringamentu na un bar/restorant den bisindario di Nikiboko. Dos persona  a keda heridá despues di e bringamentu. Esnan enbolbí den e bringamentu no ke a deklará nada na polis tokante di e esaki. No a hasi denunsia.

Aksidente unilateral: vehíkulo ta bòltu
Sentral di polis riba djadumingu 13 di febrüari 2022 alrededor di 4.50 di mainta, a risibí notifikashon di un vehíkulo ku lo a bòltu riba E. E. G. Bulevar. Shofùr di e outo tabata bou di influensia di alkohòl. Personal di ambulans a trata e shofùr na e sitio mes pa heridanan ku ela risibí na su kabes.

Detenshon despues di ignorá señal pa para
Riba djadumingu 13 di febrüari 2022 alrededor di 5.10 di mainta polis a duna señal pa para na un vehíkulo. E shofùr a ignorá e señal pa para i despues ku velosidat di 140 kilometer pa ora a dal kontra di un palu di lus di W.E.B. i bòltu. E shofùr a deklará ku e no tin doló/herida a konsekuensia di e aksidente i a deten’é pa entre otro manehá bou di influensia.

Ladronisia di 2 skuter
Riba djadumingu 13 di yanüari 2022 a hasi denunsia di ladronisia di dos skuter; un skuter blanku di marka Peugeot ku plach’i number MF-2436 i un skuter pretu di marka Sym ku plach’i number MF-174. Tur dos skuter tabata na kadena i kandal i riba djadumingu 13 di febrüari alrededor di 2.15 di mardugá i 9.15 di mainta, deskonosínan a bai ku esakinan for di den téras/veranda di un kompleho di apartamento na Kaya Ganimedes. Ta investigando e kaso.

 

Bo a mira algu sospechoso? Yama 717 8000 òf e liña di tep anónimo 717 7251.