Notisia di polis di djárason 8 di yüni te ku djabièrnè 10 di yüni 2022
Kralendijk - Kaso di bringamentu ku herido Riba djaweps 9 di yüni sentral di polis a risibí notifikahon tokante un kaso di bringamentu na un restorant situá na Kaya Korona.
Na yegada di patruya a topa ku un hòmber benta abou ku un kap na su kabes. Ambulans a hiba e hòmber hospital pa tratamentu médiko. E hòmber a deklará ku tres hòmber a atak’é di kua un a dal’é ku un bòter di serbes i un otro a dal’é ku un bate. Ta investigando e kaso.
A konfiská ‘crosser’
Alrededor di 7 or di anochi riba 9 di yüni sentral di polis a para shofùr di un crosser riba Kaya Monseigneur Nieuwindt komo ku e no tabatin hèlm bisti. Despues di kòntròl mas aleu a resultá ku e no tabatin niun otro dokumentu huntu kuné. A konfiská e ‘crosser’.
Bo a mira algu sospechoso? Yama 717 8000 òf e liña di tep anónimo 9310.