Notisia di polis di di djaluna 7 di novèmber te ku djárason 9 di novèmber 2022
Kralendijk - Skuter hòrta lokalisá Den oranan di mardugá, alrededor di 1.30 or, riba djárason 9 di novèmber a drenta keho di ladronisia di un skuter kolo pretu di marka Yamaha, numerá MF-1240. E skuter tabata stashoná dilanti di un kas situá na Kaya Mandolin i tabata na lòk ku un lòk di kontakto. Doño di e skuter a bula lanta dor di zonido pafó i a topa ku 3 mucha hòmber na momentu ku nan tabata purba hòrta skuter di e bisiña tambe. E mucha hòmbernan logra hui. E patruya ku a akudí na e sitio a bin topa ku un otro skuter di marka Yamaha, numerá MF-497, stashoná den un otro kaya pega ku Kaya Mandolin. Probablemente esaki tambe tabata prosedente di ladronisia, mirando ku e tabata stashoná mei mei di kaminda. A hiba e skuter warda di polis pa ward’e. E doño por bin busk’e despues di por mustra un ID bálido.
Aksidente ku skuter
Riba djamars 8 di novèmber, alrededor di 11.50 or di anochi, un aksidente ku un skuter a tuma lugá riba Kaya Nikiboko Sùit. E shofùr i e pasahero a kai for di e skuter. Motibu tabata probablemente e kaminda muha. Ambulans a transportá ámbos pa hospital pa tratamentu médiko.
