Notisia di polis di djadumingu 20 di novèmber te ku djabièrnè 25 di novèmber 2022
Kralendijk - Kaso di hogamentu - Riba djaweps 24 di novèmber, alrededor di algu pasa di dos di atardi sentral di polis a risibí notifikashon ku un persona a hañ’e den problema na momentu ku e tabata na Klein Bonaire. A kuminsá ku reanimashon mesora miéntras tabata tres'e kosta di Boneiru. Aki personal di ambulans a tuma ofer i a transportá e víktima pa hospital. Algun ratu despues el a bin fayesé. Ta trata di un turista krusero maskulino.
Aksidente den Centrumgebied
Riba djaweps 24 di novèmber, alrededor di 9.20 or di anochi un aksidente entre dos outo a tuma lugá den Centrumgebied. Un outo a dal patras di un otro outo. Personal di ambulans a atendé ku shofùr di outo ku tabata kore dilanti na e sitio mes I e no mester a bai hospital.
Detenshon
Riba djárason 23 di novèmber a detené tres yònkuman riba Bulevar Julio A. Abraham en konekshon ku violashon di Lei di Opio BES. Durante di un kòntròl rutinario tabatin indikashon ku tabatin violashon di Lei di Opio. Despues di kòntròl mas riguroso a bin topa ku dos tas ku komo kontenido vários artefakto pa prepará droga i tambe probablemente, hash. A detené J.E.L.B. di 18 aña i A.J.R. di 17 aña en konekshon ku violashon di Lei di Opio BES. A detené e yònkuman di inisial L.G.H. di 17 aña en konekshon ku violashon di Lei di Opio BES i tambe komo e no por a identifiká su mes. A konfiská e outo pa mas investigashon.
Insidente ku siklista
Riba djamars 22 di novèmber un insidente entre un outo i un baiskel a tuma lugá riba Kaya Nikiboko Sùit. Shofùr di un outo dado momentu kier a kita na su man robes. E siklista ku tabata koriendo dilanti di e outo aki a drenta pániko i kai for di e baiskel. Ambulans a transportá e siklista pa hospital pa tratamentu médiko.
Kiebro den kas
Riba djadumingu 20 di novèmber a drenta keho di kiebro den un kas situá na Kaya Korona. Entre 4,30 or di atardi I 9.30 or di anochi, deskonosínan a kibra drenta e kas i a bai ku entre otro un iPad kolo pus i un kolo shinishi, un spiker blou skur di marka JBL, un tablet shinishi di marka Huawei, sigaria I un tas di skouder di marka Chanel. Ta investigando e kaso.
Outo ta alkansá peaton
Den oranan di atardi riba djadumingu 20 di novèmber, outo a alkansá un peaton na e rotònde ku ta konektá Kaya Nikiboko Sùit ku Kaya Kanari i Kaya Betico Croes. Personal di ambulans a kontrolá e hòmber na e sitio mes i e por a bai kas despues. Shofùr di e outo a deklará ku dor di e rant di e winshil ku ta kousa un huki siegu, e no a mira e peaton.
Bo a mira algu sospechoso? Yama 717 8000 òf e liña di tep anónimo 9310.
