Notisia di polis di djaluna 24 di òktober te ku djabièrnè 28 di òktober 2022
Kralendijk - Kiebro den kas - Riba djadumingu 23 di òktober a drenta keho di kiebro den un kas situá na Kaya Barakuda. Deskonosínan a kibra drenta entre 12 or di mèrdia i 4.30 or di atardi i a bai ku entre otro un televishon di marka Samsung, un stòfzùiger di marka Inventum, algun joya di marka Buddha to Buddha, un Macbook Apple kolo di plata, un tas di makiahe i algun brel di solo. Ta investigando e kaso.
Outo ta dal den kas
Riba djárason 26 di òktober, alrededor di 11 or di anochi, sentral di polis a risibí notifikashon tokante un aksidente ku a tuma lugá riba Kaminda Djabou. Un outo a kore dal den un otro outo, di kual e shofùr a pèrdè kontròl i a bai dal den un kas. Shofùr di e outo ku a kore dal den e kas i un persona ku tabata den e kas na momentu di e impakto a keda heridá. Ambulans a transportá ámbos persona pa hospital pa tratamentu médiko.
Kiebro den kas
Riba djaweps 27 di òktober a drenta keho di kiebro den un kas situá na Kaya Hobo. Entre 25 i 26 di òktober deskonosínan a kibra drenta i a bai ku entre otro un ‘Playstation 5’. E kaso ta bou di investigashon.
Akshon di limpiesa di ‘beslag ruimte’(área ku ta kontené artíkulonan konfiská) di Kuerpo Polisial Hulanda Karibense
Riba djabièrnè 4 di novèmber 2022 KPCN lo organisá un akshon di limpiesa di e área ku ta kontené artíkulonan konfiská (beslag ruimte) di warda di polis Playa. Ta trata di artíkulo òf vehíkulo pa kual tin un poder hudisial pa destruí i ku mester retirá for di tráfiko di forma adekuá.
Komo ku e orígen di sierto artíkulo i vehíkulo ta deskonosí, KPCN ta hasi un petishon na tur doño di artíkulo i vehíkulo konfiská pa mèldu via mail politie@politiecn.com, via telefòn na (+599) 715 8000 òf na warda di polis na Kaya Libertador Simon Bolivar 4.
Komo doño mester mèldu ku un prueba di propiedat i mester kumpli ku e lei- i reglanan pa loke ta trata uso di e artíkulo òf vehíkulo. Por pensa riba por ehèmpel un reibeweis bálido i un prueba di seguro.
Lo destruí tur artíkulo i vehíkulo ku no a rekohé promé ku djadumingu, 30 di òktober 2022, den e akshon di limpiesa riba djabièrnè, 4 di novèmber 2022.
Bo a mira algu sospechoso? Yama 717 8000 òf e liña di tep anónimo 9310
