Notisia di polis di djárason 12 di òktober te ku djabièrnè 14 di òktober 2022
Kralendijk - Detenshon - Den oranan di mardugá riba djabièrnè 14 di òktober a detené dos hòmber. A detené un hòmber di inisial I.A.d.P. di 18 aña i un hòmber di inisial J.A.R.T. di 22 aña na Kaya Boebi en konekshon ku violashon di Lei di Opio BES. A para e sospechosonan den nan vehíkulo pa un kòntròl ku a kondusí na un rastreo den e outo. Durante di e rastreo a bin topa ku un kantidat di droga i artefaktonan pa prepará droga pa benta. Ta investigando e kaso.
Kiebro den kas
Riba djaweps 13 di òktober a drenta keho di kiebro den un kas situá na Kaminda Lagun. Entre 2.30 or di atardi i 10 or di anochi, deskonosínan a kibra drenta e kas i bai ku entre otro un kadena di oro i dos sker di kòrta mata. E kaso ta bou di investigashon.
Transportashon di pasahero den baki di pikòp ta prohibí
KPCN ta enfatisá ku transportashon di pasahero den baki di pikòp ta prohibí pa lei.
Pa añanan tabata kustumber ku ta transportá pasahero den baki di pikòp. Banda di ku esaki ta prohibí, e ta un aktividat peligroso i no seif ku por trese konsekuensianan pisa i serio pa esnan ku ta partisipá na esaki. De kaso di un aksidente hende por sali bai, ku tur posibel konsekuensia di esaki.
Pa garantisá seguridat di un i tur ku ta partisipá den tráfiko, KPCN lo tene e kuestion menshoná na bista. Kontribuí na un tráfiko sigur riba e isla dor di tene bo mes na e reglanan vigente i di e ordenansa di tráfiko.
Reglanan pa hèrmènt ku ta kore riba su mes (zelfrijdend werktuig)
Un hèrmènt ku ta kore riba su mes ta un vehíkulo grandi i pisa ku por move riba su mes manera por ehèmpel un ‘Backhaul’, ‘Forklift’, ‘Loader’, etc. Antes no tabata reglá den lei ku e shofùr mester tin reibeweis spesial pa por manehá tipo di vehíkulonan aki. Awor aki si e ta reglá den e lei ku ta na vigor. E vehíkulonan grandi aki tambe mester kumpli ku e mesun eksigensianan ku un vehíkulo motorisá normal. Pues e shofùr tambe mester tin un reibeweis bálido, seguro bálido i mester tin un plachi di number riba e vehíkulo.
KPCN ta pidi un i tur ku ta maneha un hèrmènt ku ta kore riba su mes (zelfrijdend werktuig), pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.
Bo a mira algu sospechoso? Yama 717 8000 òf e liña di tep anónimo 9310.
