Notisia di polis di djabièrnè 11 di ougùstùs te ku djaluna 14 di ougùstùs 2023
Kralendijk - Aksidente ku skuter - Riba djadumingu 13 di ougùstùs, alrededor di 6 or di atardi, un aksidente ku un skuter a tuma lugá riba Kaya Grandi. Pa motibu te ainda deskonosí, e shofùr di e skuter a kai i a resultá heridá. Ambulans a transportá e shofùr pa hòspital pa tratamentu médiko.
Outo ta dal den kurá
Riba djasabra 12 di ougùstùs, alrededor di 10 or di mainta, meldkamer sentral a haña notifikashon ku un aksidente a tuma lugá riba Kaya Nikiboko Súit. Shofùr di e outo a primi gasolin en bes di primi brek. Pa e motibu aki el a pèrdè kòntròl i bai dal den un bòrchi di tráfiko i despues den un kurá di un negoshi situá na altura di e rotònde ‘Soeurnan di Rozendaal’ na Playa. Ambulans a transportá tantu e shofùr i un okupante di e outo pa hòspital pa tratamentu médiko.
Dos aksidente riba Kaya Nikiboko Sùit
Riba djabièrnè 11 di ougùstùs, alrededor di 10 or di anochi, un aksidente entre dos outo a tuma lugá riba Kaya Nikiboko Súit. Pa motibu ainda deskonosí, un pikòp i un mini-bùs a dal frontal den otro. Ambulans a transportá shofùr di ámbos vehíkulo pa hòspital pa tratamentu médiko. Daño material na ámbos vehíkulo ta konsiderabel.
Na momentu ku tabata atendé ku e aksidente aki, un otro vehíkulo a kore kai ku su wil na banda drechi den un buraku hundu, banda di kaminda riba Kaya Nikiboko Súit. Pa e motibu aki e outo a keda pegá. Na momentu ku e agentenan a aserká e shofùr, a sinti mesora holó di alkohòl. Ademas e tabata papia ku lenga pisá. Pa e motibu aki a hasi un tèst di supla kuné. En konekshon ku e resultado, a detené e hòmber di inisial L.V.J. di 41 aña di edat pa manehá bou di influensia di alkohòl. A bai ku e outo warda di polis i a konfiská su reibeweis
Diferente detenshon pa manehá bou di influensia
Den oranan di mardugá riba djaluna 14 di ougùstùs, a detené un hòmber di inisial B.M.L. di 35 aña di edat pa manehá bou di influensia di alkohòl. A para e sospechoso na momentu ku e tabata manehá un skuter den direkshon prohibí. Durante un kòntròl, por a konstatá ku e sospechoso tabata bou di influensia di alkohòl. En konekshon ku resultado di un tèst di supla ku a hasi kuné, a detené.
Den oranan di mardugá riba djaluna 14 di ougùstùs, a detené tambe un un hòmber di inisial L.B.S. di 31 aña di edat pa manehá bou di influensia. A para e sospechoso pa un kòntròl na momentu ku e tabata manehá den direkshon prohibí riba Kaya Aruba. En konekshon ku resultado di un tèst di supla ku a hasi kuné, a detené.
Riba djasabra 12 di ougùstùs, a detené un dama di inisial Y.B. di 41 aña di edat en konekshon ku manehá bou di influensia di alkohòl i pa no duna oido na òrdu di polis. A para e sospechoso na momentu ku e tabata mustra komportashon di manehá imprudente. A duna òrdu diferente biaha pa hasi un tèst di supla pero e no tabata ke koperá ku esaki i a kuminsá komportá di forma agresivo kontra e agentenan polisial.
