Notisia di polis di djaluna 7 di ougùstùs te ku djabièrnè 11 di ougùstùs 2023
Kralendijk - ‘Fake news’ - For di djárason 9 di ougùstùs ta sirkulando un potrèt ku informashon riba medionan sosial di un hóben ku supuestamente lo ta pèrdí na Boneiru. Kuerpo Polisial Hulanda Karibense tambe a tuma nota di e pòst riba ‘facebook’ i via ‘WhatsApp’. KPCN ta enfatisá ku no a drenta ningun notifikashon (melding) di un supuesto persona pèrdí, pues e informashon aki no ta di KPCN i e no ta kuadra ku bèrdat. E mensahe aki a keda kompartí rònt i tin tur indikashon ku ta trata aki di un ‘fake news’.
'Hit & Run’
Riba djaweps 10 di ougùstùs, banda di 2.30 or di mardugá, un ‘Hit & Run’ a tuma lugá riba Kaya Libertador Simon Bolivar. Un outo ku a sali for di e sitio di stashoná outo di Jong Bonaire i lora banda robes den direkshon prohibí, a dal den un outo ku a sali for di Kaya Hermandad i lora na banda drechi pa subi Kaya Libertador Simon Bolivar. E shofùr di e outo ku a okashoná e aksidente, a sigui kore bai. Ta investigando e kaso.
Bo ta víktima di un kaso di ‘Hit & Run’? Purba identifiká plachi di number di e vehíkulo, e tipo di vehíkulo, koló di vehíkulo i e posibel shofùr. Mèldu esaki mesora na polis. E persona ku a kometé e akto aki i kore bai, tin 3 ora pa mèldu su mes na warda di polis. Si dentro di 3 ora e no mèldu, e víktima por entregá keho pa violashon di artíkulo 31 di e buki di ‘Wegensverkeersverordening Bonaire’. E ora ei, polis ta kuminsá ku un investigashon ku por yega na konsekuensianan penal.
Bo a mira algu òf bo tin mas informashon tokante e ‘Hit & Run’ aki? E ora ei tuma kontakto ku polis via 715 8000, 911 òf via e liña di tep anónimo 9310.
Kòntròl di tráfiko planiá
Den oranan lat di atardi riba djárason 9 di ougùstùs a tene un kòntròl di tráfiko planiá riba Kaminda Djabou. E kòntròl tabata dirigí riba kore ku un plachi di number na e bùmper dilanti di un outo. Aki un total di 13 shofùr a haña un prosèsferbal pa motibu ku nan no tabatin e plachi di number pegá dilanti riba e outo i no tabatin esaki huntu ku nan. E shofùrnan ku si tabatin e plachi di number huntu ku nan, a pega esaki ku tairèp parti dilanti di e outo.
Detenshon
Riba djamars 8 di ougùstùs a detené un hòmber di inisial J.A.J. di 26 aña di edat pa maltrato. Riba 29 di yüli, e sospechoso tabata den diskushon ku un otro hòmber. Na momentu ku e víktima tabata bandoná e sitio, e sospechoso a push’é for di un baiskel di kua el a kai i resultá heridá. Investigashon den e kaso ta andando.
Aksidente ku skuter
Riba djamars 8 di ougùstùs, alrededor di 1 or di mèrdia, un aksidente ku un skuter a tuma lugá riba Kaya Internashonal. E shofùr a trata den un bògt pa desviá pa algun buraku riba kaminda di kua el a bai resultá riba e banda kontrali nèt na momentu ku un vehíkulo tabata aserkando. Pa e motibu aki el a spanta i a pèrdè kòntròl. Finalmente el a resultá den mondi kantu di kaminda. Ambulans a transportá e dama shofùr pa hòspital pa tratamentu médiko.
Den oranan di mardugá riba djamars 8 di ougùstùs, un aksidente ku un skuter a tuma lugá riba Bulevar Julio A. Abraham. Pa motibunan deskonosí, shofùr di un skuter a kai i resultá heridá. Ambulans a transportá e dama shofùr pa hòspital pa tratamentu médiko. A bai ku e skuter warda di polis i e doño por pasa buska esaki na momentu ku por mustra un reibeweis bálido i un prueba di seguro bálido.
Aksidente entre tres outo
Alrededor di 9 or di mainta, riba djamars 8 di ougùstùs, ‘meldkamer’ sentral a haña notifikashon tokante un aksidente entre tres outo ku a tuma lugá na e krusada T di Kaya Amsterdam i Kaminda Djabou. Un pikòp(1) a bai dal den un outo di famia(2). Despues di e impakto e outo di famia a kèntel riba su banda riba un otro outo(3). Pa e motibu aki e shofùr i su pasahero no por a sali for di e vehíkulo. P’esei a pidi presensia di brantwer i a sera e kaya un ratu pa e partnernan di kadena por a hasi nan trabou. Ambulans a transportá ámbos víktima pa hòspital pa tratamentu médiko.
Kachó ta kousa di aksidente
Den oranan trempan di mainta riba djamars 8 di ougùstùs un aksidente a tuma lugá riba Kaya Papa Cornes. Shofùr di un pikòp a deklará ku el a desviá pa un kachó i a dal den un palu di lus. E shofùr a resultá heridá i personal di ambulans a trat’e na e sitio mes.
Detenshon pa manehá bou di influensia
Den oranan di mardugá riba djabièrnè 11 di ougùstùs, a detené un dama di inisial P.v.d.M. na altura di Plaza Wilhelmina pa manehá bou di influensia di alkohòl. E sospechoso a dal ku su outo den dos piòn di betòn. Despues di kòntròl mas aleu a hasi un tèst di supla kuné i a konsekuensia di e resultado, a detené i hib’é warda di polis pa un análisis di rosea. A bai ku e outo warda di polis i a konfiská su reibeweis.
Riba djadumingu 6 di ougùstùs a detené un hòmber di inisial J.R.T.H di 64 aña di edat na Kaya Calixta pa manehá bou di influensia di alkohòl. Despues ku ‘meldkamer’ sentral a haña un notifikashon, un patruya a bai na e sitio. E sospechoso tabata drumí den e vehíkulo ku lus sendé, mei mei riba kaminda. Na momentu ku agentenan a aserk’é, a sinti mesora holó di alkohòl. Ademas e tabata papia ku lenga pisá. A detené i a hib’é warda di polis pa hasi un análisis di rosea. A hiba e outo tambe warda di polis.
Kòntròlnan di tráfiko ta kontinuá ku regularidat
Den e dianan tras di lomba a duna diferente prosèsferbal pa manehá sin dokumentunan di Seguro bálido, sin reibeweis bálido, pa tene telefòn den man miéntras ta manehá i pa manehá sin faha di seguridat i sin hèlm bisti.
Faha di seguridat
Bisti bo faha pa bo mes seguridat. Un faha di seguridat ta protehá okupante di un outo durante di un aksidente. Dor di uza e faha e persona protehá ta keda sinta riba su stul, no tin e posibilidat pa dal su kabes den winshil i no ta keda bentá den e outo p’aki p’aya. Dor di bisti bo faha di seguridat bo chèns di tin un aksidente mortal ta baha. Tambe patras den outo bo tin ménos chèns di keda seriamente heridá ora bo tin bo faha bistí.
Telefòn
Uzando bo telefòn selular miéntras bo ta manehá, bo ta hinka bo mes, pero tambe otronan den peliger. Pasobra ora nos ta uza nos telefòn nos ta ménos alertá. Pone bo telefòn for di bista. Asina bo ta prevení e tentashon pa wak tòg. Ora bo ta partisipá den tráfiko, sea ta ku outo òf riba baiskel, ta importante pa bo ta konsientemente presente. Si bo tin un persona ku ta ferwagt un mensahe òf yamada di bo, mèldu nan promé ku por ehèmpel bo subi outo, ku bo no ta bai ta alkansabel pa un ratu.
Dokumentonan bálido
KPCN ta hala atenshon di un i tur pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.
Bo no ta kumpli ku reglanan? Bo por haña un but.
E suma di un but pa e violashonnan menshoná ta varia entre $30 te ku $225.
