Notisia di polis di djárason 16 di ougùstùs te ku djabièrnè 18 di ougùstùs 2023
Kralendijk - Detenshon pa menasa ku morto - Riba djaweps 17 di ougùstùs, alrededor di 7 or di anochi, ‘meldkamer’ sentral a haña notifikashon tokante dos hòmber ku tabata buska problema ku otro na Bario Mamparia Kutu. Na yegada di e patruya a topa ku un hòmber ku un chapi den man ku tabata den diskushon ku un otro hòmber. A konfiská e chapi. Algun ratu despues, a detené e hòmber di inisial B.N.R.R. di 33 aña di edat na Kaya Macario (Cai) Sint Jago pa menasa ku morto. A konfiská e vehíkulo di e sospechoso pa mas investigashon.
Ladronisia for di outo
Riba djaweps 17 di ougùstùs a drenta keho di ladronisia for di un outo ku tabata stashoná den Playa. Den oranan di anochi riba djárason 16 di ougùstùs, deskonosínan a bai ku un pòtmòni ku kontenido, koló máron klá di e marka Secrid. E outo no tabata na lòk. Ta investigando e kaso.
Detenshon pa ladronisia
En konekshon ku un investigashon relashoná ku un kaso di ladronisia di un tas ku a tuma lugá na un akomodashon turísitiko situá na Bulevar Julio A. Abraham, a detené dos sospechoso pa ladronisia. Riba djárason 9 di ougùstùs a detené un hòmber di inisial B.D.C. di 20 aña di edat i riba djárason 16 di ougùstùs a detené un hòmber di inisial J.R.A.B. di 21 aña di edat. Investigashon den e kaso ta andando.
Diferente prosèsferbal pa violashon den tráfiko
Riba djárason 16 di ougùstùs, alrededor di 10 or di anochi a para un vehíkulo riba Kaya Nikiboko Súit. E vehíkulo no tabatin lus di patras i tampoko lus di brek. Despues di kòntròl mas aleu a resultá ku e shofùr no por a mustra dokumentonan di seguro bálido. Pa esaki el a haña un prosèsferbal.
Alrededor di 8.30 or di anochi a para shofùr di un skuter riba Kaya Nikiboko Nort pa motibu ku e tabata kore riba karetera públiko sin un plachi di number. Despues di un kòntròl a resultá ku e skuter no tabata segurá tampoko. A bai ku e skuter warda di polis te na momentu ku e doño por mustra un seguro bálido i un plachi di number.
Alrededor di 6.30 or di atardi a para shofùr di un quad riba Kaya C.E.B Hellmund despues ku un patruya a señalá e shofùr sin un hèlm bistí. Despues di kòntròl mas aleu a resultá ku e lus di brek tampoko no tabata na òrdu. El a haña un prosèsferbal pa ámbos infrakshon.
Den oranan di mèrdia riba djárason 16 di ougùstùs a para shofùr di un skuter na Kaya Gobernador N. Debrot komo ku e tabata manehá sin un hèlm bistí. A dun’é un prosèsferbal pa esaki.
Riba djárason 16 di ougùstùs, alrededor di 11.30 or di mainta un patruya ku tabata kore riba Kaya Avelino J. Cecilia, a sinti un holó paresido na mariwana. E holó tabata prosedente for di un outo stashoná kantu di kaminda. Na momentu ku e agentenan a aserká e shofùr, el a deklará ku el a kaba huma mariwana. E agentenan a pasa over mesora pa un kòntròl den kuadro Lei di Opio BES. Durante e kòntròl den e vehíkulo a haña i konfiská un kantidat chikí di mariwana, un mashin pa pisa i un artíkulo pa prosesá droga (grinder). E shofùr no por a mustra un reibeweis bálido tampoko i haña un prosèsferbal pa manehá sin un reibeweis bálido i pa violashon di Lei di Opio BES.
Persona ilegal
Den oranan trempan di anochi riba djárason 16 di ougùstùs, un patruya a para un pikòp na Kaya Avelino J. Cecilia pa un kòntròl. Esaki despues ku a señalá e vehíkulo ku lus di brek dañá. Pa esaki e shofùr a haña un prosèsferbal. Durante e kòntròl, e pasahero no por a mustra un prueba di identifikashon bálido. Despues di un investigashon mas aleu a resultá ku e tabata permanesé di forma ilegal riba nos isla. A hiba e sospechoso warda di polis i e pas’é over pa e Departamentu di Supervishon di Estranhero (Vreemdelingen Toezicht) di KPCN. Entretantu e sospechoso a bandoná e isla.
Ladronisia di skuter
Den oranan di atardi riba djárason 16 di ougùstùs, a drenta keho di ladronisia di un skuter koló blanku di marka Peugeot, modèl V-Clic, numerá MF-3666. E skuter tabata stashoná na un sitio di stashoná outo na Kaya Boneiru i entre 3 or di mardugá i 2:30 or di atardi riba djasabra 5 di ougùstùs, deskonosínan a bai kuné. Ta investigando e kaso.
Aksidente
Riba djárason 16 di ougùstùs, alrededor di 12.30 or di mèrdia, ‘meldkamer’ sentral a haña notifikashon di un aksidente ku skuter ku a tuma lugá na altura di e rotònde riba Kaya Internashonal. Na yegada di e patruya, e shofùr a deklará ku el a kore drenta e rotònde i pa un motibu òf otro el a pèrdè kòntròl i seguidamente a bai kai ku e skuter den un roi kantu di kaminda. Pa e motibu aki, el a resultá heridá i personal di ambulans a trat’é na e sitio mes. E no mester a bai hòspital.
