Notisia di polis di djárason 2 di ougùstùs te ku djabièrnè 4 di ougùstùs 2023
Kralendijk - Outo na kandela despues di aksidente - Den oranan di mardugá riba djaweps 3 di ougùstùs, shofùr di un outo a pèrdè kòntròl riba Bulevar Gobernador N. Debrot i a bai dal den un palu di lus pa despues bòltu. Despues di esaki e outo a pega kandela. Ambos víktima a logra sali na tempu for di den e outo. Ambulans a transportá ámbos pasahero pa hòspital pa tratamentu médiko. A sera e kaya un ratu pa brantwer por a paga e kandela despues di kua por a tou e outo for di e sitio.
Shofùr ta bira malu i aksidentá
Riba djaweps 3 di ougùstùs den kareda di 10 or di mainta, ‘meldkamer’ sentral a haña notifikashon tokante un aksidente riba Kaminda Santa Barbara. Shofùr di un outo a bira malu tras di stür pa kual motibu el a baha for di kaminda i bai dal den dos outo ku tabata stashoná. E patruya ku a yega na e sitio a kuminsá mesora ku reanimashon te na momentu ku algun ratu despues personal di ambulans a tuma over. Ambulans a transportá e víktima ku urgensia pa hòspital pa tratamentu médiko. Algun ratu despues e víktima a fayesé na hòspital. Ta trata di un hòmber di inisial S.M.K. di 78 aña di edat prosedente di Estados Unidos.
Aksidente entre outo i bròmer
Alrededor di 5 or di atardi riba djaweps 3 di ougùstùs, un aksidente entre un outo i un bròmer a tuma lugá riba Bulevar Gobernador N. Debrot. A sera e kaya un ratu pa CRS i ambulans por a hasi nan trabou. Ambulans a transportá e shofùr di e bròmer pa hòspital pa tratamentu médiko.
Den oranan di mèrdia, alrededor di 12.30 or, un aksidente entre un outo i un bròmer a tuma lugá riba Kaya Macario (Cai) Sint Jago. Ambulans a transportá e shofùr di e bròmer pa hòspital pa tratamentu médiko.
Detenshon pa violashon di Lei di identifikashon
Riba djárason 2 di ougùstùs, alrededor di 9.15 or di anochi, a detené un hòmber di inisial R.J.E.J. di 25 aña di edat riba Kaminda Djabou. A para e sospechoso na momentu ku e tabata manehá un ‘crosser’ sin un hèlm bistí, sin lus i sin plachi di number. E no tabatin un reibeweis bálido ni tampoko un prueba di identifikashon. Na momentu ku a dun’é òrdu pa duna su informashonnan personal verbalmente, el a duna informashon falsu. Pa motibu ku e sospechoso no por a mustra un prueba di identidat na e sitio pa por a skibi un prosèsferbal, a detené e sospechoso pa violashon di Lei di identifikashon BES. A konfiská e ‘crosser’ pa mas investigashon.
Aksidente ku skuter
Den kareda di 7 or di anochi riba djárason 2 di ougùstùs, un aksidente ku un skuter a tuma lugá riba Bulevar E.E.G. Pa motibu nan ainda deskonosí, e shofùr i su pasahero a kai for di e skuter. Personal di ambulans a trata ámbos víktima na e sitio i finalmente a transportá e shofùr pa hòspital pa tratamentu médiko. A bai ku e skuter warda di polis pa motibu ku e pasahero no tabata den estado pa kore bai kas ku e skuter. Por pasa buska e skuter na momentu ku e shofùr por mustra un reibeweis bálido i un prueba di seguro bálido.
