Notisia di polis di djabièrnè 4 di ougùstùs te ku djaluna 7 di ougùstùs 2023
Kralendijk - Detenshon pa manehá bou di influensia - Den oranan di mardugá riba djadumingu 6 di ougùstùs a detené un hòmber di inisial J.W.M.E. di 40 aña di edat riba Kaya Nikiboko Nort pa manehá bou di influensia di alkohòl. Un patruya a para e sospechoso pa motibu ku e tabata kore zeilu riba kaminda. Durante e kòntròl rutinario, e shofùr no por a mustra un reibeweis bálido. Por a konkluí tambe ku e sospechoso tabata probablemente bou di influensia di alkohòl motibu pa kua a hasi un tèst di supla kuné. En konekshon ku resultado di e tèst di supla, a detené.
Alrededor di 10 or di anochi riba djabièrnè 4 di ougùstùs, a detené un hòmber di inisial A.W.C.W. di 55 aña di edat na un snèk situá na Kaya Gristèlchi en konekshon ku menasa ku un arma i pa manehá bou di influensia di alkohòl. E sospechoso a dal den un outo ku tabata stashoná na momentu ku e tabata trata na bandoná e sitio. Na momentu ku doño di e outo ku el a dal a bai atendé kuné riba e situashon, e sospechoso a menasá e hòmber ku un kuchú.
Bringamentu ta kaba ku detenshon
Den oranan di anochi riba djasabra 5 di ougùstùs, un bringamentu a tuma lugá na un establesimentu di hóreka situá na Kaya Papa Cornes. Dos hòmber a ataká tres otro hòmber. A maltratá dos di e hòmbernan ataká, ku un arma. Despues e sospechosonan a destruí algun parti di e outo di un di e víktimanan i a kore bai. Ambulans a transportá e víktimanan pa hòspital pa tratamentu médiko. Mas lat durante e anochi, e dos sospechosonan a bin entregá nan mes na warda di polis. A detené e hòmber di inisial J.F.A.C. di 22 aña di edat pa menasa, maltrato, maltrato ku un arma i destrukshon. A detené tambe un hòmber di inisial J.R.B.T. pa violensia públiko, maltrato ku un arma, menasa i destrukshon. Ta investigando e kaso.
Buriku ta kousa aksidente
Riba djasabra 5 di ougùstùs, alrededor di 8.30 or di anochi, un aksidente a tuma lugá riba Bulevar Gobernador Nicolaas Debrot. E shofùr di e outo a deklará ku un buriku a okashoná e aksidente. Ambulans a transportá e pasahero pa hòspital pa tratamentu médiko.
Detenshon pa stroba órden públiko
Riba djasabra 5 di ougùstùs a detené un hòmber di inisial R.R.S. di 31 aña di edat durante un evenementu riba Kaya J.N.E. Craane pa stroba órden públiko i pa buracheria públiko. E sospechoso tabata bou di influensia di alkohòl, tabata molestoso i a kuminsá komportá di forma agresivo. Pa e motibu aki a detené. Durante su detenshon, el a ofendé e agentenan polisial.
Durante ku tabata transportá e sospechoso aki, un hòmber a purba entrevistá e sospechoso ku un telefòn. A duna e hòmber òrdu pa hala den banda pa motibu ku e tabata opstakulisá transporte di e sospechoso. E no a duna oido na esaki i a sigui ku e entrevista. A bolbe dun’é òrdu pa stòp ku esaki i a dun’é un stot leve. Aki e hòmber a bini dirigí riba e agente i a kuminsá komportá di forma agresivo. Aki e agente a push’é ku mas forsa pa kual motibu e hòmber a kai. Algun ratu despues a detené e hòmber di inisial A.N.J. di 53 aña di edat pa no duna oido na órden di polis.
‘Hit & Run’
Den oranan di mainta riba djasabra 5 di ougùstùs, un ‘Hit & Run’ a tuma lugá riba Kaya Monseigneur Nieuwindt. Un outo ku tabata bandoná un sitio di stashoná outo di un supermerkado, a dal den un otro outo ku tabata drenta e sitio di stashoná outo i a sigui kore bai. E outo a haña daño na su bahul.
Bo ta víktima di un kaso di ‘Hit & Run’? Purba identifiká plachi di number di e vehíkulo, e tipo di vehíkulo, koló di vehíkulo i e posibel shofùr. Mèldu esaki mesora na polis.
E persona ku a kometé e akto aki i kore bai, tin 3 ora pa mèldu su mes na warda di polis. Si dentro di 3 ora e no mèldu, e víktima por entregá keho pa violashon di artíkulo 31 di e buki di ‘Wegensverkeersverordening Bonaire’. E ora ei, polis ta kuminsá ku un investigashon ku por yega na konsekuensianan penal.
Bo a mira algu òf bo tin mas informashon tokante e ‘Hit & Run’ aki? E ora ei tuma kontakto ku polis via 715 8000, 911 òf via e liña di tep anónimo 9310.
