Ban selebrá karnaval 2023 na un manera seif i responsabel
Kralendijk - Despues di 2 aña nos ta bai selebrá karnaval atrobe. Ta un temporada di fiesta i goso. A resultá ku e ora ei sa pèrdè e reglanan vigente i responsabilidat pa ku nos mes i nos próhimo for di bista. Pero esaki no ta nifiká ku e reglanan ta ménos vigente.
P’esei den e temporada benidero, KPCN lo intensivá e kòntròlnan di tráfiko na sitionan stratégiko i ku ta hopi bishitá. Den kaso ku no kumpli ku reglanan di tráfiko lo atendé ku e shofùr di forma estrikto.
Ta importante pa tur hende tene nan mes na e reglanan vigente di tráfiko pa asina alsa siguridat den tráfiko. Pasobra tráfiko sigur no ta solamente un asuntu di polis pero di shofùrnan di vehíkulonan motorisá tambe. Outomobilistanan i otronan mester ta konsiente ku: ta nan propio responsabilidat pa usa faha di seguridat, di e peliger di papia i manda mensahe na telefòn ora ta stür, di e peliger di uso di alkohòl ora ku ta stür i kon pa kore ku mucha den outo na un manera responsabel ( por ehèmpel no sintá dilanti den outo, sino den un stul pa mucha patras den outo, etcetera).
KPCN ke enfatisá ku ta esensial tambe pa nos sòru bon pa nos mes i nos yunan durante di karnaval. Por ehèmpel pa paga bon tinu riba bo yunan, uza dòpi di orea pa nan kontra di e muzik duru i siñ’é ken ta e persona konserní pa yud’é (polis) i kiko e mester bisa si e pèrdè. . Pero tambe dor di bebe di manera responsabel i uza kùpnan re-usabel pa ko’i bebe na lugá di glas òf bòter, asina bo ta prevení situashonnan peligroso. Si bo ta bebe, no stür. Mirando ku durante di karnaval lo bo ta oranan largu for di kas ta deseabel pa sera bo kas bon i sòru pa e tin sufisiente iluminashon ora bo sali. Stashoná bo outo na un lugá seif, pero no tras di barikada i no laga kos balioso den outo. Pa finalisá polis ta hasi un yamada na un i tur pa duna oido na eventual òrdu di polis. Asina nos por selebrá un karnaval seif i responsabel.
Kuerpo Polisial Hulanda Karibense ta deseá un i tur un felis Karnaval.
Bo a mira algu sospechoso? Yama 717 8000 òf e liña di tep anónimo 9310.
