Notisia di polis di djabièrnè 17 di febrüari te ku djabièrnè 24 di febrüari 2023

Un outo ku tres okupante a kore pasa riba Kaya Gilberto F. Croes miéntras esaki tabata será ku barikada. Na momentu ku polis a para nan, a konstatá ku tur tres tabata bou di influensia di alkohòl. A transportá tur tres pa warda di polis pa un análisis di rosea. Resultado di e análisis tabata motibu pa kita reibeweis di e shofùr pa un tempu indefiní i a tene tur tres hòmber na warda di polis te na momentu ku marcha di karnaval a kaba.

Djasabra 18 di febrüari último marcha di karnaval grandi a kana sin niun problema na Rincon. Riba djadumingu 19 di febrüari durante marcha grandi na Playa a hasi un detenshon. E sospechoso no a duna oido na òrdu di polis. Riba djamars 21 di febrüari durante marcha di despedida a detené tres hóben en konekshon ku violensia públiko despues di un bringamentu riba Bulevar Julio A. Abraham. Ta trata aki di un hòmber di inisial J.M.F.P. di 21 aña di edat,  un hòmber di inisial, J.E.G.T. di 18 aña di edat i un mucha muhé di inisial S.I.W. di 17 aña di edat.

Por konkluí ku e periodo di karnaval tabata unu trankil kaminda pueblo a laga mira atrobe ku huntu nos por sòru pa un karnaval seif i dushi. KPCN ta gradisí un i tur pa nan kontribushon i ta enfatisá un biaha mas ku huntu nos ta karga e responsabilidat pa un isla seif.

Kaso di hogamentu
Riba djaweps 23 di febrüari, alrededor di 2 or di atardi meldkamer sentral a risibí notifikashon ku tin un kurpa ta drif den laman den besindario di e pir di salu. Un empleado di e kompania di salu na e sitio a saka e persona for di laman i mesora a kuminsá ku reanimashon. Pero esaki tabata en bano. E hòmber di inisial A.N.S. nasé riba 2 di sèptèmber 1951, prosedente di Estados Unidos a bin fayesé. 

Kòntròl di tráfiko planiá
Riba djárason 22 di febrüari den oranan lat di atardi a tene un kòntròl di tráfiko planiá riba Kaya Industria. Durante di e kòntròl aki a para i kontrolá un total di 18 vehíkulo. A duna un total di 3 prosèsferbal; 2 pa manehá sin seguro bálido i 1 pa kore sin plachi di number.

Kòntròlnan di tráfiko ta tuma lugá regularmente. KPCN ta hala atenshon di un i tur pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.

Bo no ta kumpli ku reglanan? Bo por haña un but.
E suma di un but pa e violashonnan menshoná ta varia entre $30 te ku $225.

Outo ta kore drenta mondi
Riba djárason 22 di febrüari den oranan di anochi un aksidente a tuma lugá riba Kaminda di Sabana Piedra Krus. Pa motibunan ainda deskonosí un outo a kore drenta mondi. Ambulans a transportá e shofùr i un okupante pa hòspital pa tratamentu médiko. E shofùr a haña un prosèsferbal pa manehá sin un reibeweis bálido i sin seguro bálido.

Outo ta bòltu
Riba djaluna 20 di febrüari, alrededor di 12 or di mardugá un aksidente entre dos vehíkulo a tuma lugá riba Kaya Internashonal. Un di e outonan a bòltu i keda riba su banda. A pidi presensia di brantwer pa yuda saka saka shofùr di e outo, pero e mes a logra sali. A bin konstatá ku e shofùr tabata bou di influensia di alkohòl i pa e motibu aki a detené. Ta trata di un hòmber di inisial N.A.H. di 56 aña di edat. Ambulans a transportá e pasahero di e otro outo pa hòspital pa tratamentu médiko.

Detenshon
Riba djasabra 18 di febrüari a detené un hòmber di inisial D.A.N. di 38 aña di edat riba Kaminda Tra’i Montaña en konekshon ku manehá bou di influensia. Un patruya a nota un outo ta kore wela riba kaminda. A para e outo mirando ku esaki tabata forma un peliger pa otro partisipantenan den tráfiko. E shofùr no por a mustra un reibeweis bálido, un seguro bálido i tampoko un prueba di identidat bálido. Despues ku a pidi e shofùr pa baha for di e outo, a konstatá ku e tabata bou di influensia di alkohòl.

Bo a mira algu sospechoso? Yama 717 8000 òf e liña di tep anónimo 9310