Notisia di polis di djabièrnè 13 di yanüari te ku djaluna 16 di yanüari 2023
Kralendijk - Aksidente entre outo i skuter - Riba djaluna 16 di yanüari den oranan di mainta un aksidente entre un outo i un skuter a tuma lugá na e krusada di Bulevar Miguel Pourier i Kaya Papaya, na altura di e parada di bùs. E outo tabata kore den direkshon di Playa riba Bulevar Miguel Pourier i e skuter tabata bini for di Kaya Papaya. Shofùr di e skuter no a mira e outo i a kore dal den banda di pasahero di e outo. Ambulans a transportá shofùr di e skuter pa hòspital pa tratamentu médiko.
A haña kurpa sin bida den kas
Riba djaluna 16 di yanüari sentral di polis a risibí notifikashon ku a haña un kurpa sin bida den un kas situá na Kaya Kobalt. Dòkter ku a presentá na e sitio a konstatá morto natural. Ta trata di un hòmber di inisial B.Mc.C nasé riba 15 febrüari 1954.
Ladronisia di vários plachi di number
Riba djadumingu 15 di yanüari a drenta keho di ladronisia di dos plachi di number numerá B-964. E outo tabata stashoná riba un sitio di stashoná outo na Kaya Libertador Simon Bolivar. Algun ratu despues a drenta keho ku deskonosínan a bai ku dos plachi di number di algun outo ku tabata stashoná riba un sitio di stashoná outo di un kompania den Kaya Grandi. Ta trata aki di e plachinan di number B-1544 i B-8423.
Den oranan di atardi a drenta keho di ladronisia di un plachi di number mas numerá V-7049 di un pikòp ku tabata stashoná na un kompleho di apartamentu situá na Kaya Nikiboko Sùit.
Deskonosínan a bai ku e plachinan di number menshoná entre djasabra 14 di yanüari i djadumingu 15 di yanüari. Ta investigando e kasonan.
Detenshon pa ladronisia
Riba djasabra 14 di yanüari den oranan di anochi a detené un hòmber di inisial J.G.B. di 51 aña di edat pa ladronisia. Esaki despues ku a drenta notifikashon di ladronisia riba e mesun anochi den dos kas na Lagun Hill. For di un kas a bai ku un skuter i na un otro kas a gara tres hòmber na momentu ku nan tabata tratando na bai ku un katròl pa warda slan, un stòfzùiger pretu ku bèrdè, un kaha di hèrmènt koló shinishi skur, un kaha di hèrmènt koló shinishi i un skèr di kòrta mata. Den un mondi den serkania a bin topa ku e skuter i algun otro kos menshoná. E otro dos hòmbernan a logra hui. Ta investigando e kaso.
Bo a mira algu sospechoso? Yama 717 8000 òf e liña di tep anónimo 9310.
