Notisia di polis di djabièrnè 30 di desèmber 2022 te ku djabièrnè 6 di yanüari 2023

Sambuyadó a fayesé
Riba djaluna 2 di yanüari alrededor di 12.50 or di mèrdia, sentral di polis a risibí notifikashon tokante un sambuyadó ku a haña su mes den problema na kosta sùit di Boneiru. Personal di ambulans a kuminsá ku reanimashon pero esaki tabata enbano. Dòkter ku a presentá na e sitio a konstatá morto di un hòmber di 63 aña di edat di inisial R.A.P.

Aksidente ku skuter
Riba djadumingu 1 di yanüari, un aksidente ku un skuter a tuma lugá riba Kaya Monseigneur Nieuwindt. Shofùr di e skuter a deklará ku el a kai den un buraku, i a pèrdè kontròl motibu pa kual e i su pasahero a kai. Ambulans a transportá ámbos pa hòspital pa tratamentu médiko.

Hòmber detené
Riba djasabra 31 di desèmber a detené un hòmber di 51 aña di edat di inisial S.U.C.D riba Kaya Korona pa manehá bou di influensia di alkohòl. E hòmber a kore pasa den un kaya ku polis tabatin será. Na momentu ku tabata atendé kuné, a konstatá ku e tabata bou di influensia di alkohòl. A hiba e vehíkulo warda di polis.

Aksidente
Riba djabièrnè 30 di desèmber, un aksidente a tuma lugá riba Kaya Internashonal. Shofùr di un skuter ku tabata manehando riba Kaya Internashonal direkshon Playa a pèrdè kòntròl i kai na momentu ku algu mas leu un pikòp a sali for di un sitio di stashoná outo di un akomodashon turístiko i subi kaminda. E skuter i e pikòp no a dal den otro. Ambulans a transportá shofùr di e skuter i su pasahero pa hòspital pa tratamentu médiko

Aksidente ku skuter
Riba djabièrnè 30 di desèmber alrededor di 7.30 or un aksidente ku un skuter a tuma lugá riba Kaya Internashonal. Shofùr di e skuter a pèrdè kontròl i a kai. A transportá e shofùr ku ambulans pa hòspital pa tratamentu médiko.

Bo a mira algu sospechoso? Yama 717 8000 òf e liña di tep anónimo 9310