Notisia di polis di djárason 18 di yanüari te ku djabièrnè 20 di yanüari 2023
Kralendijk - Hòmber detené - Riba djabièrnè 20 di yanüari den oranan trempan di mainta alrededor di 4 or, a para un outo den Kaya Grandi pa kòntròl. Komo ku tabatin un holó fuerte di probablemente mariwana ta sali for di e outo, a bai over na un kòntròl relashoná ku e Lei di Opio BES. E shofùr i e pasahero no tabatin un reibeweis bálido huntu ku nan. Den e vehíkulo a bin topa ku sèn kèsh i a konfiská esaki. Durante e kòntròl e shofùr a kuminsá insultá e agentenan polisial i esaki a kondusí na su detenshon. Ta trata di un hòmber di 30 aña di edat ku inisial X.J.G.. A hiba e vehíkulo warda di polis.
Outo na kandela
Riba djaweps 19 di yanüari alrededor di 6.15 or di mainta, sentral di polis a risibí notifikashon tokante un outo na kandela den kurá di un kas situá na Hanchi Amboina. Brantwer ku a akudí na e sitio a paga e kandela. No tabatin herido. Kousa di e kandela no ta konosí.
Disfrutá, pero bebe na midi
Atrobe ta kasi wikènt. KPCN ke avisá pa konsumí alkohòl ku límite si bo ta partisipá den tráfiko. Asina bo ta prevení situashonnan fèrfelu pa bo mes i pa otronan. Ta prohibí pa partisipá den tráfiko si bo a konsumí mas ku e kantidat máksimo permití. Si bo mester bai warda i ta haña un but ta dependé di e resultado di e tèst di supla.
Tèst di supla
Ku un tèst di suplá polis ta kontrolá si bo ta bou di influensia di alkohòl. Bo ta obligá di partisipá na e tèst di supla. E tèst aki ta mustra si bo a bebe mas ku ta permití pa lei. Resultado di e tèst aki ta determiná si bo mester bai warda investigashon mas aleu. Bo ta nenga di hasi e tèst? E ora ei bo ta haña un prosèsferbal. Dependiendo di e resultado di e tèst di supla bo mester bai warda di polis pa un análisis di rosea. Durante e investigashon aki polis ta midi presis kuantu alkohòl bo a konsumí ku un aparato spesial.
Bo ta manehá bou d influensia di alkohòl? E ora ei bo ta haña un but, un prohibishon (temporal) pa manehá, un kastigu di prisòn òf un kombinashon di e kastigunan aki. E peso di e kastigu ta dependé di e seriedat di e situashon. Bo ta involukrá den un aksidente? E ora ei ta tèst bo mas lihé pa konsumo di alkohòl ku durante di un kontrol rutinario.
Mi ta kastigabel si mi ta fuma komo peaton?
Esaki ta posibel. Polis por duna un prosèsferbal pa buracheria públiko. Polis a topa bo den estado burachi? E ora ei polis ta uza bo aparensia di buracheria i bo aktitut. E ora ei no ta hasi un tèst di supla.
KPCN ta deseá un i tur un wikènt seif i plasentero!
Bo a mira algu sospechoso? Yama 717 8000 òf e liña di tep anónimo 9310.
