Kuerpo Polisial Hulanda Karibense ta hala atenshon di shofùrnan pa ta mas atento pa bòrchinan di tráfiko den Kaya Grandi
Kralendijk - Kaya Grandi ku resientemente a keda renobá, tin bòrchinan di tráfiko nobo. Polis lo aktua severo riba kumplimentu ku e bòrchinan aki. E bòrchi ku por mira na entrada di Kaya Grandi (imágen 1) na altura di Tourism Corporation Bonaire (TCB), ta nifiká ku ta prohibí pa stashoná pafó di e espasio indiká, na e banda di kaya ku e bòrchi ta.
Pa motibu ku tin un bòrchi na ámbos banda di kaya, ta nifiká ku e regla ta konta pa banda robes i drechi di e kaya. E regla aki ta keda bálido te ku despues di Digicel, kaminda tin un bòrchi solamente na banda drechi di kaminda. Aparte di esei bo tin ku ta konsiente ku e espasio entre e balanan di betòn na banda di kaminda, no ta lugá pa stashoná. Pues no ta permití pa stashoná ningun tipo di vehíkulo entre esakinan (imágen 2).
Paga tinu tambe riba e bòrchinan ku tin na entrada di Kaya Almirante Pedro Luis Brion (imágen 3).
E espasio di stashoná ku e bòrchi di karga i deskargá (laden en lossen), kaminda bo por stashoná pa un tempu kòrtiku, ta únikamente destiná pa hiba òf buska merkansia. Pues nan no ta destiná pa stashoná di forma liber. Bo tin ku hasi uzo di e espasio aki pa stashoná pa buska òf hiba un merkansia? Keda tur ora den bisindario di e vehíkulo. Esaki pa na momentu ku tene un kòntròl (imágen 4).
Esaki ta konta tambe pa e bòrchi di personanan invalidó. Ademas por mira e bòrchinan aki na diferente sitio mas den Playa, entre otro den e hanchi konektá na Kaya Prinses Marie (imágen 5).
Polis lo aktua riba esaki tambe. Si bo no ta kumpli ku e bòrchinan di tráfiko, por duna òrdu pa kita bo vehíkulo. Bo por haña un prosèsferbal di máksimo 85 dòler i ta tou bo vehíkulo ku un kran. E gastunan aki tambe ta bini riba bo propio kuenta.
