Notisia di polis di djárason 5 di yüli te ku djabierne 7 di yüli 2023

Kantidat di prosèsferbal durante diferente kòntròl di tráfiko

Durante e último dianan, Kuerpo Polisial Hulanda Karibense (KPCN) a tene diferente kòntròl di tráfiko na vários sitio na Boneiru.

Den oranan di mainta riba djárason 5 di yüli, a tene un kòntròl di tráfiko riba Kaya Industria i Kaya Internashonal. Durante e kòntròl na Kaya Industria, a kontrolá un total di ocho outo i un skuter. A duna dos prosèsferbal. Unu pa manehá sin un reibeweis bálido i unu pa manehá sin seguro bálido. Mas despues a tene un kòntròl di tráfiko na Kaya Internashonal. Aki tambe a kontrolá nuebe vehíkulo. A duna 1 prosèsferbal pa manehá sin faha di seguridat bistí.

Mas despues den oranan di anochi a tene un kòntròl di tráfiko planiá na altura di Kaya Nikiboko Sùit i Kaya Julio C. van der Ree. Durante di e kòntròl aki, a kontrolá un total di 52 vehíkulo. A duna un total di 21 prosèsferbal.

E prosèsferbalnan tabata pa lo siguiente:

6x pa manehá sin seguro bálido

11x pa manehá sin reibeweis bálido

2x pa manehá sin faha di seguridat bistí

1x pa kore ku un lus di dilanti defekto

1x pa kore un vehíkulo sin un plachi di number

Den oranan di atardi riba djaweps 6 di yüli a tene un kòntròl di tráfiko planiá riba Kaya Korona. Durante di e kòntròl aki, a duna un total di 20 prosèsferbal.

E prosèsferbalnan tabata pa lo siguiente:

1x pa manehá sin hèlm bistí

13x pa manehá sin faha di seguridat bistí

2x pa manehá sin reibeweis bálido

4x pa manehá sin seguro bálido

KPCN ta hala atenshon di un i tur pa nan tin e dokumentunan nesesario, na òrdu. Tambe ta konsehá estriktamente pa kumpli ku e reglanan di Lei di Tráfiko. Den e dianan binidero, polis lo sigui tene e tipo di kòntròlnan aki.

Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.

Kuerpo Polisial Hulanda Karibense ku yamada na mayornan i kuidadónan di muchanan pa ta alerta ora ta laganan hunga riba telefòn

Awor ku temporada di fakansi ta bai kuminsá, ‘meldkamer’ sentral hopi biaha ta haña yamada di muchanan ku ta hunga ku telefòn. E tempu i atenshon ku nos sentralistanan ta tuma pa kontestá e yamadanan aki i purba saka’fo si enrealidat e mucha ta den un peliger òf un kaso di emergensia, por sòru ku un persona ku sí ta den peliger òf mester di yudansa urgente, no por haña un sentralista riba e number di emergensia.

Tene na kuenta ku asta un telefòn sin ‘sim card’, por keda yama e number di emergensia.