Notisia di polis di djabièrnè 10 di mart te ku djárason 15 di mart 2023

A detené shofùr di skuter
Den oranan di atardi riba djaluna 13 di mart a detené un hòmber di inisial J.M.H.C. di 19 aña di edat den Bario Den Tera pa no duna oido na òrdu, pa duna resistensia durante di detenshon i pa violashon di Lei di Identifikashon. Un patruya a spòt e sospechoso na momentu ku e tabata kore sin hèlm bisti riba un skuter ku no tabatin plachi di number tampoko. E patruya a bai tras di e skuter i a dun’e señal pa e para pero e sospechoso no a duna oido na esaki. Despues di a kore tras di e skuter pa un ratu a logra para e sospechoso i a detené.

Aksidente ku skuter
Riba djadumingu 12 di mart alrededor di 4.30 or di atardi, un aksidente ku un skuter a tuma lugá riba Kaya Korona. Shofùr di e skuter a deklará ku el a bai wanta brek na momentu ku su skuter a slep i el a kai. Ambulans a transportá shofùr di e skuter pa hòspital pa tratamentu médiko. E agentenan ku a yega na e sitio a opservá ku tabatin un supstansia riba kaminda ku probablemente tabata kousa di e aksidente. Mas despues a resultá ku tabatin zeta riba kaminda for di Kaya Papa Cornes te ku Kaya Jose Girigorio Hernandez. Brantwer a asistí pa basha santu riba kaminda pa evitá mas kaso di slepmentu.

Detenshon pa maltrato
Den oranan trempan di mainta riba djadumingu 12 di mart, a detené un hòmber di inisial J.P.G.J.G. di 46 aña di edat na un bar/restorant en konekshon ku violensia públiko i maltrato. E sospechoso tabata enbolbí den un bringamentu kaminda un persona a resultá heridá.

Mas i mas detenshon pa manehá bou di influensia
E kantidat di detenshon pa manehá bou di influensia di alkohòl ta oumentando. E wikènt ku a pasá tambe a realisá algun detenshon.

Den oranan di anochi riba djaluna 13 di mart, a detené un hòmber di inisial B.D.L.C.S en konekshon ku manehá bou di influensia. E sospechoso tabata enbolbí den un aksidente riba Kaya J.N.E. Craane. El a deklará ku e tabata na telefòn i a pèrdè kòntròl riba su stür pa kual motibu el a bai resultá riba algun blòki di betòn kantu di kaminda. Despues di un kòntròl mas aleu a resultá ku e tabata bou di influensia di alkohòl i e no tabatin un reibeweis bálido huntu kuné tampoko. A detené i hib’e warda di polis pa un análisis di rosea. A konsekuensia di e resultado a dun’e un prohibishon pa manehá di 9 ora i un prosèsferbal pa e violashonnan menshoná.

Den oranan di anochi riba djasabra 11 di mart, a detené dos hòmber riba Kaya Nikiboko Nort. Ta trata aki di un hòmber di inisial J.W.D.H.B. di 39 aña di edat i un hòmber di inisial M.G.M. di 28 aña di edat. Mas despues a resultá ku e hòmbernan tabata enbolbí den un aksidente i a kuminsá bringa ku otro. Despues di kòntròl mas aleu a resultá ku ámbos hòmber tabata bou di influensia di alkohòl, motibu pa kual a detené nan. A transportá ámbos pa warda di polis pa un análisis di rosea. A konsekuensia di e resultado mesora a konfiská reibeweis di e sospechoso di inisial M.G.M. te ku próksimo aviso. E sospechoso di inisial J.W.D.H.B. a risibí un prohibishon pa manehá di 6 ora.

Alrededor di 12.45or  di mardugá riba djasabra 11 di mart a detené un hòmber di inisial I.M.C. di 60 aña di edat na Kaya Maria en konekshon ku manehá bou di influensia. A para shofùr di e outo pa un kòntròl rutinario i a konstatá ku e tabata bou di influensia di alkohòl. Pa e motibu aki a detené. A bai ku su outo warda di polis.

Riba djabièrnè 10 di mart, a detené un hòmber di inisial A.G.G.C. di 52 aña di edat en konekshon ku manehá bou di influensia. A para e sospechoso na momentu ku el a drenta Kaya Grandi den direkshon prohibí. Despues di kòntròl mas aleu a resultá ku e shofùr tabata bou di influensia di alkohòl i a detené.

KPCN ke avisá pa konsumí alkohòl ku límite si bo ta partisipá den tráfiko. Asina bo ta prevení situashonnan fèrfelu pa bo mes i pa otronan. Ta prohibí pa partisipá den tráfiko si bo a konsumí mas ku e kantidat máksimo permití. Si bo mester bai warda i ta haña un but ta dependé di e resultado di e tèst di supla.

Bo ta manehá bou di influensia di alkohòl? E ora ei bo ta haña un but, un prohibishon (temporal) pa manehá, un kastigu di prisòn òf un kombinashon di e kastigunan aki. E peso di e kastigu ta dependé di e seriedat di e situashon. Bo ta involukrá den un aksidente? E ora ei ta tèst bo mas lihé pa konsumo di alkohòl ku durante di un kontrol rutinario.

A repartí 31 but durante kòntròl di tráfiko
Den oranan di mainta riba djasabra 11 di mart, Kuerpo Polisial Hulanda Karibense (KPCN) a tene un kòntròl di tráfiko riba Kaya Industria en konekshon ku seguridat di tráfiko. Durante di e kòntròl aki a kontrolá un total di 56 vehíkulo. A duna un total di 31 prosèsferbal.

Partikularmente pa manehá sin faha di seguridat bistí mayoria biaha a duna but.

E prosèsferbalnan tabata pa lo siguiente:
15x pa manehá sin faha di seguridat bistí
3x pa manehá sin reibeweis bálido
8x pa manehá sin seguro bálido
1x pa uzo di telefòn tras di stür1x manehá sin hèlm bistí
3x manehá sin plachi di number

Bisti bo faha pa bo mes seguridat. Un faha di seguridat ta protehá okupante di un outo durante di un aksidente. Dor di uza e faha e persona protehá ta keda sinta riba su stul, no tin e posibilidat pa dal su kabes den winshil i no ta keda bentá den e outo p’aki p’aya. Dor di bisti bo faha di seguridat bo chèns di tin un aksidente mortal ta baha ku 30 pa 40%. Tambe patras den outo bo tin 20% ménos chèns di keda heridá seriamente ora bo tin bo faha bistí. KPCN ta hala atenshon di un i tur pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko.

Bo no ta kumpli ku reglanan? Bo por haña un but.
E suma di un but pa e violashonnan menshoná ta varia entre $30 te ku $225.

Bo a mira algu sospechoso? Yama 717 8000 òf e liña di tep anónimo 9310