Notisia di polis di djaluna 6 di mart te ku djárason 8 di mart 2023
Kralendijk - A haña persona ku a fayesé - Riba djamars 7 di mart, alrededor di 12 or di mèrdia meldkamer sentral a risibí notifikashon ku a enkontrá un persona ku no ta duna señal di bida den un bibienda riba Kaya Macario Sint Jago. Dòkter a konstatá morto natural di un hòmber di 83 aña di edat di inisial J.C.K.
Kòntròl di velosidat Tra’i Montaña
Durante oranan di mainta riba djamars 7 di mart, Kuerpo Polisial Hulanda Karibense (KPCN) a tene un kòntròl di tráfiko dirigí un bes mas riba velosidat di vehíkulonan. E kòntròl di tráfiko a tuma lugá riba Kaminda Gurubu. A midi velosidat di e vehíkulonan ku tabata aserkando ku un mididó di velosidat spesial (lasergun).
Riba Kaminda Gurubu e velosidat máksimo ku ta permití ta 60 km pa ora. Durante e kòntròl a midi velosidat di un total di 33 outo i a duna 9 prosèsferbal pa surpasá e velosidat máksimo ku ta permití. E velosidat ku a midi tabata entre 80 pa 90 km pa ora. Tambe a para un vehíkulo sospechoso ku na momentu ku a mira polis, a trata na bira bèk i kore bai. Un patruya a bai su tras i dun’é òrdu pa para. Durante di e kòntròl a resultá ku e shofùr no tabatin ni reibeweis ni papelnan di seguro bálido huntu kuné. E shofùr a haña un prosèsferbal pa e violashonnan menshoná.
KPCN lo kontinuá ku e tipo di kòntròl dirigí riba velosidat aki den e próksimo dianan na diferente parti di nos isla i ta atvertí tur outomobilista pa paga tinu riba nan velosidat. Den área urbanisá (bebouwde kom), 40 km pa ora ta e velosidat máksimo i pafó di bebouwde kom ta 60 km pa ora.
Bo a mira algu sospechoso? Yama 717 8000 òf e liña di tep anónimo 9310.
