Notisia di polis di djaluna 13 di novèmber te ku djárason 15 di novèmber 2023
Kralendijk - Turista ta fayesé - Riba djárason 15 di novèmber, alrededor di 1 or di mèrdia, ‘meldkamer’ sentral a risibí notifikashon tokante un hòmber ku a bira malu na momentu ku e tabata snòrkel. E hòmber tabata un turista krusero ku a bai snòrkel ku un grupo. A hiba e víktima kantu ku boto kaminda personal di ambulans mesora a kuminsá ku reanimashon. Ambulans a transport’é ku urgensia pa hòspital. Despues di yegada na hòspital lamentablemente e víktima a bin fayesé. Ta trata di un turista maskulino di inisial R.L.B. nasé riba 5 di yüni 1953 na Estados Unidos.
Kòntròl di tráfiko planiá
Den oranan di mainta riba djárason 15 di novèmber, a tene un kòntròl di tráfiko planiá riba Kaya Internashonal. Durante e kòntròl a kontrolá trinta(30) vehíkulo i a duna nuebe(9) but.
E butnan tabata pa lo siguiente:
1x pa manehá sin reibeweis bálido;
4x pa manehá sin seguro bálido;
4x pa manehá sin faha di seguridat bistí.
KPCN ta hala atenshon di un i tur pa nan tin e dokumentunan nesesario, na òrdu. Tambe ta konsehá estriktamente pa kumpli ku e reglanan di Lei di Tráfiko. Den e dianan binidero, polis lo sigui tene e tipo di kòntròlnan aki.
Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.
Boto a keda pegá
Riba djamars 14 di novèmber, alrededor di 11 or di anochi, ‘meldkamer’ sentral a risibí notifikashon di un boto ku a pega riba ref na altura di Sorobon. Mesora a dirigí un patruya den e direkshon i na yegada por a mira e boto leu aya. Mirando e situashon di laman i no tabatin otro manera pa yega na e boto, Wardakosta a disidí pa pidi yudansa di helikòpter. E boto ku dos hòmber abordo tabata riba ruta pa Aves for di Kòrsou na momentu ku diripiente nan a haña problema sùit di Boneiru. E kapitan a deklará ku e no tabata sinti su kurpa muchu bon, motibu pa kua el a laga su tripulante nabegá e boto. Algun ratu despues el a tende un zonido duru i a mira ku e boto a pega riba ref. Na e momentu ei e boto a kuminsá yena ku awa. Helikòpter a trese e dos hòmbernan seif na e bich di Sorobon.
Aksidente
Riba djamars 14 di novèmber , alrededor di 7.15 or di mainta, ‘meldkamer’ sentral a risibí notifikashon tokante un aksidente entre dos outo na e skina di Kaminda Djabou i Kaya Neerlandia. Un di e paseheronan, un menor di edat a resultá levemente heridá. Personal di ambulans a opta pa transportá ámbos menor di edat ku tabata den un di e outonan enbolbí, pa hòspital pa tratamentu i kòntròl médiko.
Detenshon Lei di Opio
Riba djaluna 13 di novèmber, alrededor di 10 or di anochi, ‘meldkamer’ sentral a risibí notifikashon tokante un outo sospechoso na Kaya Klafir. E vehíkulo tabata pará pa oranan largu ku su motor sendé. Na yegada di e patruya a topa un pikòp ku dos persona drumí. Pa kontrolá ku tur kos tabata bon ku e pasaheronan, polis a opta pa lanta e personanan for di soño. Na momentu ku e agentenan a habri porta di e vehíkulo i a kuminsá kombersá ku e shofùr, a sinti un holó fuerte di probablemente supstansianan narkótiko. E agentenan a pasa over mesora pa un kòntròl den kuadro Lei di Opio BES. Tabatin tres tas dilanti riba e stul di pasahero di kua e shofùr a kue un di e tasnan i a tir’é den mondi. Despues di un investigashon riba e tas, a enkontrá algun saku chikitu di plèstik ku probablemente supstansianan narkótiko. Seguidamente a topa tambe ku dos blòki chikitu di probablemente hash den e tas. Durante kòntròl den e vehíkulo a haña un saku chikitu mas ku supstansianan probablemente narkótiko. Pa e motibu aki a detené e hòmber di inisial J.L.M. di 35 aña di edat pa violashon di Lei di Opio BES.
Bo a mira algu sospechoso? Yama 717 8000 òf e liña di tep anónimo 9310.
