Entidat Públiko Boneiru i Kuerpo Polisial Hulanda Karibense ta hasi un yamada pa manehá di manera seif i responsabel riba kaminda di Rincon
Kralendijk - E wikènt aki e parke pa ‘drift’ di Boneiru ta habrí atrobe pa partisipante i pa públiko. E parke pa ‘drift’ nobo aki ta brinda fanátikonan di e deporte e posibilidat pa ehersé esaki na un manera ku ta mas seif pa tur enbolbí i tambe pa e órden públiko.
Pa sòru pa mantené e seguridat pa un i tur sinembargo ta di gran importansia pa tur ku ta partisipá den tráfiko tene nan mes na e reglanan di tráfiko riba karetera públiko na momento ku ta yega òf ku ta bandoná e parke pa ‘drift’. Espesialmente dor ku e kaminda di Rincon ta bira mas drùk awor dor di aktividatnan na e parke pa ‘drift’, ta importante pa paga bon tinu i pa ta alerta riba karetera pa bo seguridat pero tambe pa e seguridat di otronan.
Entidat Públiko Boneiru i Kuerpo Polisial Hulanda Karibense ta hasi un yamada na un i tur pa manehá di manera seif i responsabel. Si bo ta manehá un bròmer òf skuter, bisti un hèlm, bisti bo faha di seguridat, no uza telefòn selular miéntras bo ta manehá i mantené bo mes na e velosidat máksimo permití. Den área habitá e velosidat máksimo permití ta 40 km/ pa ora i pafó di esaki e ta 60 km/pa ora. Hasiendo esaki bo tambe ta kontribuí na un tráfiko seif riba e isla. E periodo benidero lo tene kòntròl ku regularidat, kaminda lo aktua ku man duru si bo no tene bo mes na e reglanan di tráfiko vigente.
Bo no ta tene bo mes na e reglanan? E ora ei bo por haña un but. E suma di un but pa e violashonnan menshoná ta varia entre $30 i $225.
Bo a mira algu sospechoso? Yama 717 8000 òf e liña di tep anónimo 9310.
