Notisia di polis di djabièrnè 15 di sèptèmber te ku djaluna 18 di sèptèmber 2023
Kralendijk - A bai ku dos skuter despues di fevermentu - Riba djadumingu 17 di sèptèmber, alrededor di 6 or di atardi, ‘meldkamer’ sentral a risibí notifikashon tokante fevermentu na Kaya Aruaco. Na yegada di patruya, a mira un hòmber riba un skuter koriendo den direkshon di Kaya Leeuwarden. Na momentu ku el a mira polis, el a lora i bai bèk den direkshon di Nort’i Saliña. Polis a sigui kore i bai su tras. E sospechoso a kore bai para banda di un otro hòmber riba un skuter. E agentenan a kuminsá ku un investigashon na e sitio i a konfirmá ku ámbos shofùr tabata enbolbí den e ponementu di ‘fever’. Na momentu ku a pidi e hòmbernan pa identifiká nan mes, solamente unu por a kumpli ku e petishon. E otro shofùr no tabatin un plachi di number riba su skuter. En konekshon ku e infrakshon nan menshoná, a bai ku ámbos skuter warda di polis.
Diferente prosèsferbal pa violashon den tráfiko
Alrededor di 9.45 or di mainta riba djadumingu 17 di sèptèmber a para un skuter riba Kaya Nikiboko Sùit. E shofùr no por a mustra dokumentunan di e skuter i e number di chásis tabata vago. El a haña un prosèsferbal pa manehá sin seguro bálido i a konfiská e skuter pa mas investigashon.
Riba djasabra 16 di sèptèmber a duna dos shofùr ku tabata enbolbí den aksidente, un prosèsferbal. E promé shofùr tabata enbolbí den un aksidente entre dos outo riba Kaya Oro. El a haña un prosèsferbal pa manehá sin seguro bálido. E di dos shofùr tabata enbolbí den un aksidente entre dos outo riba Kaya Korona. El a haña un prosèsferbal pa manehá sin seguro bálido i sin reibeweis bálido.
Riba djasabra 16 di sèptèmber, alrededor di 6.20 or di atardi, a para un skuter riba Kaya Pos di Amor. E shofùr tabata manehá sin un hèlm bistí. Despues di un kòntròl mas aleu a resultá ku e skuter tabatin un plachi di number falsifiká. A konfiská e plachi di number i e shofùr a haña un prosèsferbal pa manehá sin un hèlm bistí.
Ademas a duna tres (3) prosèsferbal pa manehá sin reibeweis bálido, un (1) prosèsferbal pa manehá sin seguro bálido, un (1) prosèsferbal pa manehá sin faha di seguridat bistí i un (1) prosèsferbal pa stashoná robes.
Bringamentu ta kondusí na detenshon
Alrededor di 10 or di anochi riba djasabra 16 di sèptèmber, ‘meldkamer’ sentral a risibí notifikashon tokante un kaso di bringamentu na un establesimentu di hóreka situá na Kaya Nikiboko Nort. Un agente polisial na sivil a purba tene e situashon bou di kòntròl te na momentu ku patruya a yega na e sitio. Na yegada di e patruya a detené ámbos sospechoso pa maltrato. Ta trata di e hòmber di inisial J.M.O.R. di 61 aña di edat i un hòmber di inisial J.R.C.C. di 54 aña di edat.
Kòntròl di tráfiko planiá
Den oranan di mainta riba djasabra 16 di sèptèmber a tene un kòntròl di tráfiko plania riba Kaya Papa Cornes. Durante e kòntròl a para i kontrolá un total di shete (7) shofùr i a duna kuater (4) prosèsferbal.
A duna prosèsferbal pa e siguiente violashonnan:
3x pa manehá sin faha di seguridat bistí
1x pa lus di direkshon (richtingaanwijzer)
KPCN ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.
Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.
Ladronisia for di outo
Riba djasabra 16 di sèptèmber a drenta keho di ladronisia for di un outo ku tabata stashoná riba un sitio di stashoná outo riba Kaya Soeur Bartola. Entre 3 or di atardi i 11.40 or di anochi riba djabièrnè 15 di sèptèmber, deskonosínan a habri e vehíkulo probablemente ku un yabi falsifiká i a bai ku diferente bien. Ta investigando e kaso.
Detenshon pa manehá bou di influensia
Den oranan di mardugá riba djasabra 16 di sèptèmber a para un outo riba Kaya Gilberto F. Croes. E shofùr a pasa dal ku su spil di outo, den spil di un vehíkulo polisial riba Kaya Hermandad i a sigui kore. Na momentu ku a par’é i aserk’é pa atendé kuné riba su komportashon, por a konstatá ku e hòmber tabata papia ku lenga pisá, su aliento tabata hole alkohòl, e tabatin wowo kòrá i e no por a para riba su pianan. A detené e hòmber di inisial S.M.v.E di 24 aña di edat pa manehá bou di influensia di alkohòl. A hib’é warda di polis pa un análisis di rosea i a konsekuensia di e resultado a konfiská su reibeweis.
Bo a mira algu sospechoso? Yama 911/112 òf e liña di tep anónimo 9310.
