Notisia di polis di djárason 20 di sèptèmber te ku djabièrnè 22 di sèptèmber 2023
Kralendijk - Bringamentu ta kondusí na detenshon - Riba djárason 20 di sèptèmber, alrededor di 6.30 or di anochi, ‘meldkamer’ sentral a risibí notifikashon tokante un bringamentu na un ‘Cruyff Court’ situá na Kaya Monseigneur Nieuwindt. Durante e bringamentu dos persona a resultá heridá. Un hòmber a resultá heridá ku un balki di palu. E víktima a bai hòspital riba su mes. E otro víktima a resultá heridá ku un machete durante e bringamentu. Ambulans a transport’é pa hòspital pa tratamentu médiko. Algun ratu despues a detené un hòmber di inisial J.M.F.P. di 22 aña di edat na hòspital pa maltrato ku un arma i un hòmber di inisial B.A.U.C. di 19 aña di edat pa maltrato ku un arma i maltrato severo. Investigashon den e kaso ta andando.
KPCN ta hasi yamada na doñonan di skuternan hañá pa mèldu (wak potrèt)
Riba djaluna 18 di sèptèmber a detené un hòmber di inisial J.M.A.H. en konekshon ku enkubrimentu. Durante di e detenshon a konfiská tres (3) skuter, probablemente prosedente di ladronisia.
Bo ta rekonosé un di e skuternan aki? Mèldu bo mes na warda di polis na Playa ku un prueba di identifikashon, un reibeweis i prueba di seguro bálido. Tene kuenta ku mester por prueba ku abo ta doño di e skuter por medio di un keho resien hasí, potrèt, faktura di pago, number di chasis òf algu por estilo. Pa duna un tep anónimo por yama e liña di tep anónimo 9310.
Detenshon pa ladronisia
Riba djárason 20 di sèptèmber, alrededor di 6 or di atardi, a detené un hòmber di inisial K.R.R.A. di 22 aña di edat na warda di polis riba Kaya Libertador Simon Bolivar. E sospechoso tabata enbolbí den un kaso di ladronisia. Investigashon den e kaso ta kontinuá.
Diferente but pa violashon den tráfiko
Entre djárason 20 di sèptèmber i djabièrnè 22 di sèptèmber a duna diferente prosèsferbal pa violashon den tráfiko.
A duna un (1) but pa manehá sin hèlm bistí, un (1) but pa manehá sin reibeweis bálido, un (1) but pa uso di telefòn miéntras ta stür, dos (2) but pa manehá sin faha di seguridat bistí, un (1) but pa manehá sin hèlm bistí i sin reibeweis bálido, un (1) but pa uso di telefòn miéntras ta stür i pa manehá sin faha di seguridat bistí i un (1) but pa manehá sin seguro bálido i pa uso di telefòn miéntras ta stür.
Tambe a duna dos shofùr ku tabata enbolbí den aksidente, un but. E promé shofùr tabata enbolbí den un aksidente entre dos outo riba Kaya L.D. Gerharts. El a haña un but pa manehá sin seguro bálido. E di dos shofùr tabata enbolbí den un aksidente entre dos outo riba Kaya Korona. El a haña un but pa manehá sin reibeweis.
Ladronisia na kunuku
Riba djárason 20 di sèptèmber a drenta keho di ladronisia for di un kas na un kunuku situá na Bará di Karta. Entre 11.15 or di mainta i 2.45 or di atardi, deskonosínan a fòrsa un porta di dilanti i a bai ku entre otro un bateria solar i un kámara pretu di marka Panasonic. Na e sitio a konfiská algun artíkulo importante pa e investigashon.
Ladronisia di aparato di preshon haltu
Den oranan di mainta riba djárason 20 di sèptèmber a drenta keho di ladronisia di un aparato di preshon haltu. E aparato tabata pafó den kurá di un kas situá na Kaya Hulanda. Entre 12 or di mardugá i 12.30 or di mardugá deskonosínan a bai kuné. Ta investigando e kaso.
Bo a mira algu sospechoso? Yama 911/112 òf e liña di tep anónimo 9310.
