Notisia di polis di djárason 27 di sèptèmber te ku djabièrnè 29 di sèptèmber 2023
Kralendijk - Búskeda di hòmber pèrdí ta kontinuá - Den oranan lat di tramèrdia riba djaweps 28 di sèptèmber, ‘meldkamer’ sentral a risibí notifikashon tokante un hòmber pèrdí. Den oranan di atardi mesora a inisiá un búskeda pa e hòmber di nòmber Rodrigo Thode, di 69 aña di edat. Riba e dia aki, alrededor di 11 or di mainta tabata e último biaha ku tabatin kontakto ku e persona aki. Rodrigo tabatin un karson kòrtiku koló blou i un blusa blanku ku blou bistí. Na pia e tabatin sandalia bistí. A informá prensa tambe ku a publiká un pòtrèt di e hòmber.
Den oranan di atardi, un persona a yama ‘meldkamer’ sentral i a deklará ku pa mas o ménos 2 or di mèrdia el a mira un persona paresido na e hòmber ku a duna su deskripshon, den besindario di Kaminda Broertje Janga na altura di Sabadeco. KPCN a start un búskeda na pia i ku outo den e área i ku kolaborashon di e avion dash i helikòpter di Wardakosta. Alrededor di 10.45 or di anochi a para e búskeda sin resultado. Den transkurso di dia riba djabièrnè 29 di sèptèmber, e búskeda ta kontinuá.
Polis ta pidi un i tur ku por a mira òf tende algu, tin informashon òf sa paradero di Rodrigo Thode, pa tuma kontakto mesora ku polis na 715-8000, 911 òf via di e liña di tep anónimo 9310.
Kòntròl di tráfiko planiá
Den oranan di atardi riba djárason 27 di sèptèmber, Kuerpo Polisial Hulanda Karibense (KPCN) a tene un kòntròl di tráfiko planiá riba Kaya Nikiboko Sùit en konekshon ku seguridat den tráfiko. Durante di e kòntròl aki, a kontrolá un total di 39 vehíkulo di kua 28 outo, 9 trùk, 1 skuter i 1 bròmer. A duna un total di 23 but.
E but tabata pa lo siguiente:
6x pa manehá sin faha di seguridat bistí
5x pa manehá sin seguro bálido
8x pa manehá sin reibeweis bálido
3x pa manehá sin plachi di number
1x pa manehá sin hèlm bistí
Durante e kòntròl aki, a bai ku un bròmer warda di polis pa motibu ku e shofùr no tabatin niun di e dokumentunan nesesario na òrdu.
Ketu bai diferente but pa violashon den tráfiko
Entre djaluna 25 di sèptèmber i djabièrnè 29 di sèptèmber a duna diferente but pa violashon den tráfiko durante kòntròlnan rutinario.
E butnan tabata pa lo siguiente:
2x pa manehá sin hèlm bistí
2x pa manehá sin reibeweis bálido
7x pa manehá sin faha di seguridat bistí
KPCN ta hala atenshon di un i tur pa nan tin e dokumentunan nesesario, na òrdu. Tambe ta konsehá estriktamente pa kumpli ku e reglanan di Lei di Tráfiko.
Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.
Bo a mira algu sospechoso? Yama 911/112 òf e liña di tep anónimo 9310.
