Notisia di polis di djárason 30 di ougùstùs te ku djabièrnè 01 di sèptèmber 2023
Kralendijk - Kòntròl di velosidat - Den oranan di mainta riba djaweps 31 di ougùstùs, Kuerpo Polisial Hulanda Karibense (KPCN) a tene dos kòntròl di tráfiko dirigí riba velosidat di vehíkulonan. E kòntròlnan di tráfiko a tuma lugá riba Bulevar Gobernador Nicolaas Debrot i riba Bulevar EEG. A midi velosidat di vehíkulonan ku tabata aserkando ku un aparato pa midi velosidat spesial (lasergun).
Durante e kòntròl na Bulevar Gobernador Nicolaas Debrot a midi velosidat di un total di 40 vehíkulo i a duna 7 prosèsferbal pa surpasá e velosidat máksimo di 40 km pa ora ku ta permití den área urbanisá (bebouwde kom). E velosidat ku a midi tabata entre 50 pa 65 km pa ora.
Durante e di dos kòntròl riba Bulevar EEG a midi e velosidat permití tantu den área urbanisá (bebouwde kom, 40 km) i pafó di bebouwde kom ku ta 60 km pa ora. A midi velosidat di un total di 63 vehíkulo i a duna 3 prosèsferbal pa surpasá e velosidat máksimo di 40 km pa ora ku ta permití. E velosidat ku a midi tabata entre 57 pa 66 km pa ora. Tambe a duna un shofùr un prosèsferbal pa manehá sin reibeweis i sin seguro bálido.
KPCN lo kontinuá ku e tipo di kòntròl dirigí riba velosidat aki na diferente parti di nos isla i ta atvertí tur outomobilista pa paga tinu riba nan velosidat.
Detenshon durante entrada hudisial
Riba djaweps 31 di ougùstùs, den oranan trempan di mainta, a tene dos entrada hudisial. E promé tabata den un kas den Nikiboko i e di dos tabata den un kas den Amboina. E entradanan ta relashoná ku sospecho di violashon di Lei di Arma BES. Durante di e entradanan hudisial no a topa ku arma di kandela. A konfiská algun artíkulo, probablemente prosedente di ladronisia. Tambe a detené un yònkuman di inisial J.R.K. di 17 aña di edat en konekshon ku e investigashon ku ta andando.
Detenshon
Riba djaweps 31 di ougùstùs a detené un hòmber di inisial B.R.B. di 20 aña di edat pa manehá bou di influensia i pa no duna oido na òrdu di polis. A spòt e sospechoso na momentu ku e tabata kore den direkshon prohibí ku su skuter. Polis a dun’é señal pa para di kual e no a duna oido na esaki i a sigui kore. Despues di a kore su tras un ratu, e sospechoso a dal den asera i a kai. Despues di un kòntròl mas aleu a konstatá ku e sospechoso tabata bou di influensia di alkohòl i a detené. El a haña un prosèsferbal pa kore den direkshon prohibí. A hiba e skuter warda di polis.
Grupo di kachó ta kousa di aksidente
Den oranan di atardi riba djárason 30 di ougùstùs un aksidente ku un skuter a tuma lugá na Kaminda Lac. Shofùr di e skuter a deklará un grupo di kachó a kore su tras ku konsekuensia ku el a pèrdè kòntròl i kai. E shofùr a resultá heridá i ambulans a transporte pa hospital pa tratamentu médiko. No a topa ku e kachónan.
