Notisia di polis di djabièrnè 12 di aprel te ku djaluna 15 di aprel 2024
Kralendijk - Detenshon - Den oranan di anochi riba djasabra 13 di aprel, a detené un dama di inisial S.M.S. di 22 aña di edat i un dama di inisial S.R.P. di 41 aña di edat. A detené e promé sospechoso na warda di polis i algun ratu despues a detené e di dos sospechoso na Kaya Taki. E detenshonnan aki ta den kuadro di un investigashon relashoná ku kasonan di ladronisia di último tempu di vehíkulonan, bou di kua E-bikes i skuter. Investigashon den e kasonan ta kontinuá.
Detenshon pa manehá bou di influensia
Riba djabièrnè 12 di aprel, alrededor di 9.20 or di anochi, a detené un hòmber di inisial J.v.E. di 23 aña di edat riba Kaya Amsterdam pa manehá bou di influensia di alkohòl. Pa motibunan te ainda deskonosí, e sospechoso a kore dal den un bòrchi di tráfiko i seguidamente el a bai dal den un palu kantu di kaminda. Durante un kòntròl por a konstatá ku e sospechoso tabata mustra vários karakterístika di un persona ku ta bou di influensia di alkohòl. A hasi un tèst di supla ku e sospechoso i a resultá ku el a konsumí mas alkohòl ku ta permití. A detené e sospechoso i a transport’é pa warda di polis pa un análisis di rosea. A konsekuensia di e resultado di esaki, a kita su reibeweis.
Diferente but pa violashon den tráfiko
Entre djaluna 25 di mart i djaluna 15 di aprel a duna diferente but pa violashon den tráfiko durante kòntròlnan rutinario.
E butnan tabata pa lo siguiente:
8x pa manehá sin hèlm bistí;
17x pa manehá sin reibeweis bálido;
2x pa tene telefòn den man miéntras ta manehá;
12x pa manehá sin seguro bálido;
3x pa manehá sin plachi di number;
2x pa manehá sin faha di seguridat bistí.
KPCN ta hala atenshon di un i tur pa nan tin e dokumentunan nesesario, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla.
Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.
A topa ku kurpa sin bida
Riba djaweps 11 di aprel, alrededor di 7 or di mainta, ‘meldkamer’ sentral a risibí notifikashon ku a topa ku un kurpa sin bida den un kas na Lagun Hill. Despues di un investigashon di e departamentu forénsiko, dòkter a konstatá morto di un dama di inisial M.L.J.Z. di 60 aña di edat, nasé riba 14 di febrüari 1964 na Hulanda. Komo ku na promé instante no por a haña kontakto ku famia di e defuntu na Hulanda, no por a komuniká e notisia aki mas promé.
