Notisia di polis di djabièrnè 19 di aprel te ku djaluna 22 di aprel 2024
Kralendijk - Aksidente entre outo i kabai - Riba djasabra 20 di aprel, alrededor di 9.20 or di anochi, ‘meldkamer’ sentral a risibí notifikashon di un aksidente riba Kaminda Tra'i Montaña. Un outo a alkansá un kabai i su ginete. Ambulans a transportá e ginete pa hòspital pa tratamentu médiko. A detené shofùr di e outo di inisial R.R. di 71 aña, pa manehá bou di influensia di alkohòl. A konfiská e vehíkulo di e sospechoso. Dor di e heridanan ku e kabai a sufri, a pone dòkter di bestia na altura.
Aksidente entre outo i bròmer
Alrededor di 1.50 or di atardi riba djasabra 20 di aprel, un aksidente a tuma lugá riba Kaya Grandi na altura di Kaya Carlos A. Nicolaas. E shofùr di e bròmer a deklará ku e tabata kore den direkshon nort riba Kaya Grandi na momentu ku diripiente un outo a subi kaminda for di Kaya Carlos A. Nicolaas ku konsekuensia ku el a bai dal den e outo. E shofùr di e bròmer a resultá levemente heridá i personal di ambulans a trat’é na e sitio mes. A sera e kaya un ratu te na momentu ku e servisionan konserní tabata kla ku nan trabounan.
Bringamentu ta kondusí na detenshon
Riba djasabra 20 di aprel, alrededor di 10.30 or di mainta, ‘meldkamer’ sentral a risibí notifikashon tokante un bringamentu riba Kaya Macario (Cai) Sint Jago. Despues di un aksidente a surgi un bringamentu entre dos muhé. Na dado momentu un hòmber tambe a drenta entre nan. Durante e bringamentu, un di e muhénan a heridá e otro ku un yabi di habri tayer riba su kabes. A konsekuensia di esaki, ambulans a transportá e víktima pa hòspital pa tratamentu médiko. A detené un muhé di inisial S.R.N.V. di 35 aña di edat pa maltrato ku un arma i pa violensia públiko. Tambe a detené un hòmber di inisial J.S.G.M. di 21 aña di edat pa maltrato i violensia públiko. Ta investigando e kaso.
Kandela den outo
Alrededor di 9 or di anochi riba djabièrnè 19 di aprel, ‘meldkamer’ sentral a risibí notifikashon tokante un outo sin okupante ku tabata na kandela riba Kaya Inglatera. Ademas tabata kore peliger pa e kandela ekspandé debí ku tabatin otro vehíkulonan stashoná banda di e outo en kuestion. Despues ‘meldkamer’ sentral a bolbe haña notifikashon ku e situashon ta bou di kòntròl. Na yegada di e patruya no tabatin kandela mas paso e persona ku a mèldu a paga esaki. E persona ku a mèldu a deklará ku e tabata paden den kas, i a tende un zonido duru. El a kore bai pafó i a mira e baul di e outo ku tabata stashoná dilanti su porta di kurá, na kandela. Despues el a tira awa riba e baul di e outo pa paga esaki. Segun e persona ku a mèldu, e kandela a inisiá dor di un korto sirkuito. Brantwer tambe a bini na e sitio pa kontrolá si e kandela ta bon pagá. No tabatin herido.
Aksidente entre skuter i pikòp
Riba djabièrnè 19 di aprel, alrededor di 12.20 or di mèrdia, un aksidente entre un skuter i un pikòp a tuma lugá riba Kaya Kaminda Djabou. Un skuter a dal patras di un pikòp. E shofùr di e pikòp a deklará ku el a indiká ku su lus di direkshon ku e ta bai lora i na e momentu ei un skuter a dal patras di su pikòp. Pa e motibu aki e skuter a keda pegá bou di e pikòp. Ambulans a transportá shofùr di e skuter pa hòspital pa tratamentu médiko.
Diferente but pa violashon den tráfiko
Entre djaluna 15 di aprel i djaluna 22 di aprel a duna diferente but pa violashon den tráfiko durante kòntròlnan rutinario.
E butnan tabata pa lo siguiente:
3x pa manehá sin reibeweis bálido;
3x pa manehá sin seguro bálido;
1x pa manehá sin hèlm bistí;
1x pa manehá sin plachi di number.
KPCN ta hala atenshon di un i tur pa nan tin e dokumentunan nesesario, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla.
Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.
