Notisia di polis di djabièrnè 26 di aprel te ku djaluna 29 di aprel 2024
Kralendijk - Aksidente ku diferente herido - Den oranan di mardugá riba djaluna 29 di aprel, alrededor di 2.35 or, ‘meldkamer’ sentral a risibí notifikashon tokante un aksidente riba Kaminda di Rincon na altura di Subi Blanku. Un outo di hür a drenta mondi, bòltu i keda riba su banda. Na yegada di e patruya. E kuater (4) okupantenan di e outo tabata pafó di e outo di kua dos tabata heridá na suela i dos tabatin raskunan. Dos ambulans a presentá na e sitio i a transportá dos di e personanan ku tabata den e outo di kua e shofùr pa hòspital pa tratamentu médiko. Despues nan por a bai kas. E dos otro pasaheronan ku a resultá levemente heridá a haña tratamentu médiko na e sitio mes. E pasaheronan a deklará ku nan tabata kore direkshon di Playa i na dado momentu un pikòp a hala i pasa nan. E pikòp a dal den e parti dilanti di e outo pa kual motibu e shofùr di e outo a pèrdè kòntròl i drenta mondi. E pikòp a sigui kore bai. A sera e kaya temporalmente di ámbos banda pa e servisionan konserní por a hasi nan trabou seif. Ta investigando e kaso.
Boto a subi tera
Riba djadumingu 28 di aprel, alrededor di 8.15 or di mainta, ‘meldkamer’ sentral a risibí notifikashon tokante un boto ku a subi tera i tabata riba e barankanan na altura di Boka Bartol den Parke Washington. Mesora a dirigí un patruya huntu ku STINAPA i KMar i na yegada no a topa ku niun hende na e sitio. Wardakosta a tou e boto den direkshon di Playa i polis a konfiská esaki pa mas investigashon.
Aksidente entre dos vehíkulo
Riba djadumingu 28 di aprel, alrededor di 1 or di mardugá, un aksidente entre dos vehíkulo a tuma lugá riba Kaminda di Onima, riba kaminda di Rincon. Ta trata di un aksidente entre un outo di famia i un pikòp. E vehíkulonan tabatin daño na e parti dilanti. Ambos shofùr a deklará ku nan tabata kore ku lus grandi (bright) dor di kua nan a blèndu i dal den otro. Despues e shofùr di e outo di famia a pèrdè kòntròl i a bai dal den un kurá di sumpiña di un kunuku. Niun hende no a resultá heridá. A sera e kaya temporalmente pa e servisionan konserní por a hasi nan trabou.
Aksidente Kaya Petra
Riba djasabra 27 di aprel, alrededor di 1.50 or di mèrdia, ‘meldkamer’ sentral a risibí notifikashon tokante un aksidente riba Kaya Petra. Un outo a bai dal den un muraya di betòn i a bai resultá den kurá di un kas. E shofùr a resultá heridá. Pa motibu ku e porta di outo no por a habri dor di e daño, a pidi ayudo di brantwer pa saka e shofùr for di e outo. Seguidamente a logra habri e porta di outo pero e shofùr tabata intrankil i no tabata deseá tratamentu médiko ni e no tabata ke bai hòspital. Finalmente a transportá e víktima pa hòspital pa tratamentu médiko.
Outo a bòltu
Alrededor di 6.20 or di mainta riba djasabra 27 di aprel, un aksidente a tuma lugá riba Kaminda di Onima, riba kaminda di Rincon. Un outo a bòltu, dal den un palu i keda riba su banda den mondi kantu di kaminda. E shofùr a deklará ku e tabata kore direkshon di Rincon i a pega soño ku konsekuensia ku el a haña un aksidente. Personal di ambulans a hasi un chekeo médiko ku e shofùr na e sitio mes i e no mester a bai hòspital. A pone brantwer na altura pa kòrta e palunan ku a keda riba kaminda.
