Notisia di polis di djabièrnè 5 di aprel te ku djárason 10 di aprel 2024

Riba djabièrnè 5 di aprel, alrededor di 8.40 or di anochi, a detené un hòmber di inisial W.P.P.P. di 37 aña di edat riba Kaya Andres A. Emerenciana pa manehá bou di influensia di alkohòl. E sospechoso tabata enbolbí den un aksidente riba e kaya menshoná. Durante e kòntròl por a konstatá ku e sospechoso tabata mustra vários karakterístika di un persona ku ta bou di influensia di alkohòl. A hasi un tèst di supla ku e sospechoso i a resultá ku el a konsumí mas alkohòl ku ta permití. A detené e sospechoso i a hib’é warda di polis pa un análisis di rosea. A konsekuensia di e resultado di esaki, el a haña un prohibishon di manehá di 2 ora.

Ladronisia for di vehíkulo

Riba djamars 9 di aprel a drenta keho di ladronisia for di un outo ku tabata stashoná na e kasnan di katibu hel na Bulevar EEG. Entre 11 or di mainta i 1.15 or di mèrdia riba djasabra 6 di aprel, deskonosínan a bai ku un tas blanku di marka Old Navy for di e outo, na momentu ku e doño a bai snòrkel. Den e tas tabatin diferente artíkulo, entre otro un kámara koló kòrá di marka Olympus tipo TG6, diferente paña, slòfnan i artíkulonan di snòrkel. Ta investigando e kaso.

Polis ta pidi kualkier persona ku por a mira algu, a tende algu òf tin informashon relevante pa e investigashon, pa tuma kontakto ku polis na 715-8000 òf via di e liña di tep anónimo 9310.

Desgrasia ku outo

Riba djaluna 8 di aprel, ‘meldkamer’ sentral a risibí notifikashon tokante un desgrasia na un kas na Sabadeco Courts. E víktima a lubidá di aktivá e brek di man di su vehíkulo na momentu ku el a baha for di esaki ku konsekuensia ku ora el a baha i bai pasa patras di e vehíkulo, e vehíkulo a kore bai patras i dal den su pianan. Ambulans a transportá e víktima pa hòspital pa tratamentu médiko.

Kiebro den negoshi

Riba djaluna 8 di aprel a drenta keho di ladronisia di un negoshi situá na Bulevar EEG. Entre 12.30 or di mardugá i 8 or di mainta riba djaluna 8 di aprel, deskonosínan a bai ku un seif digital ku kontenido. Ta investigando e kaso.

Aksidente outo i skuter

Riba djasabra 6 di aprel, alrededor di 11.45 or di anochi, un aksidente entre un outo i un skuter a tuma lugá na e krusada di Kaya Korona i Kaya Caribe. Despues di un investigashon a resultá ku e shofùr di e skuter tabata bini for di Playa direkshon nort. Aki e no a duna preferensia na e outo ku tabata bini for di den direkshon kontrali. Pa e motibu aki e outo a dal den e skuter. Ambulans a transportá e víktima pa hòspital pa tratamentu médiko. A duna e shofùr di e outo un but pa manehá sin seguro bálido. Polis a dirigí tráfiko temporalmente te na momentu ku e servisionan konserní a kaba ku nan trabou.

Aksidente pikòp i E-bike

Riba djasabra 6 di aprel, alrededor di 8.20 or di anochi, ‘meldkamer’ sentral a risibí notifikashon tokante un aksidente entre un pikòp i un E-bike riba e krusada di Kaya Internashonal i Kaya Maximiliana Rosario. Na yegada di e patruya, e shofùr di e E-bike tabata heridá drumi na suela. Despues di un investigashon a resultá ku e E-bike tabata bini ku velosidat haltu dor di kua tabata difísil pa e shofùr a wanta brek na momentu ku e kier a lora na su man drechi. P’esei el a bai dal den un pikòp ku tabata pará pa sali na e krusada. Ambulans a transportá e víktima pa hòspital pa tratamentu médiko.

Outo a bòltu

Riba djasabra 6 di aprel, alrededor di 4.30 or di atardi, un aksidente a tuma lugá riba Kaminda La Union. Un outo a bòltu. Na yegada di e patruya, e outo tabata den mondi kantu di kaminda i e shofùr tabata pegá den e vehíkulo. A pone brantwer inmediatamente na altura pa bini na e sitio pa asistí den saka e víktima for di e outo. Despues di esaki por a konstatá ku e víktima tabata stabil, pero tabata mustra vários karakterístika di un persona ku ta bou di influensia di alkohòl. Despues di un investigashon, a duna e sospechoso òrdu pa hasi un tèst di supla. Despues di diferente intento, e sospechoso no por a kumpli ku e tèst di supla. Dor di diferente karakterístika ku e sospechoso tabata mustra, a detené pa manehá bou di influensia di alkohòl. Pa motibu ku el a kuminsá sinti su stoma ta wal, ambulans a transport’é pa hòspital pa chekeo médiko. Mester a sera e kaya pa tráfiko te na momentu ku e servisionan konserní a kaba ku nan trabou.

Detenshon pa manehá bou di influensia ta sigui oumentá
Den e periodo tras di lomba a realisá un kantidat di detenshon riba karetera públiko pa manehá bou di influensia di alkohòl. Kuerpo Polisial Hulanda Karibense ke avisá pa konsumí alkohòl ku límite si bo ta partisipá den tráfiko. Asina bo ta prevení situashonnan fèrfelu pa bo mes i pa otronan. Ta prohibí pa partisipá den tráfiko si bo a konsumí mas ku e kantidat máksimo permití. Si bo mester bai warda di polis, ta dependé di e resultado di e tèst di supla.

Tèst di supla
Ku un tèst di suplá polis ta kontrolá si bo ta bou di influensia di alkohòl. Bo ta obligá di partisipá na e tèst di supla. E tèst aki ta mustra si bo a bebe mas ku ta permití pa lei. Resultado di e tèst aki ta determiná si bo mester bai warda investigashon mas aleu. Bo ta nenga di hasi e tèst? E ora ei bo ta haña un prosèsferbal. Dependiendo di e resultado di e tèst di supla bo mester bai warda di polis pa un análisis di rosea. Durante e investigashon aki polis ta midi presis kuantu alkohòl bo a konsumí ku un aparato spesial.

Bo ta manehá bou d influensia di alkohòl?
E ora ei bo ta haña un but, un prohibishon (temporal) pa manehá, un kastigu di prisòn òf un kombinashon di e kastigunan aki. E peso di e kastigu ta dependé di e seriedat di e situashon. Bo ta involukrá den un aksidente? E ora ei ta tèst bo mas lihé pa konsumo di alkohòl ku durante di un kontrol rutinario.

Mi ta kastigabel si mi ta fuma komo peaton?
Esaki ta posibel. Polis por duna un prosèsferbal pa buracheria públiko. Polis a topa bo den estado burachi? E ora ei polis ta uza bo aparensia di buracheria i bo aktitut. E ora ei no ta hasi un tèst di supla.